Aizawl : Samlukhai Health & Wellness Centre Building sak thar chu Aizawl S-III MLA Prof. F. Lalnunmawia’n nimin khan a hawng.
Hawnna inkhawmah thu sawiin Prof. F. Lalnunmawia chuan mi thenkhatin MNF sorkar hi thil dang aia sports infrastructure, a bikin football ground siam uar lutuk angin sawi thin mah se, a bial chhungah hriselna leh zirna lamah hmasawnna tam tak an neih bakah, PHE department kaltlangin mipuite tui hnianghnar zawka pekna turin nasa taka hmalak a nih thu a sawi a, “He’ngte hi sports lama hmalakna aiin a thahnem fe zawk,” a ti.
Aizawl South III bialtu MLA hian a bial chhunga Health minister leh health department hmalakna hrang hrang sawiin, Samlukhai Health & Wellness Centre leh Maubuangah Health Sub-Centre leh Staff Quarters-te sak thar a ni a. Health & Wellness Centres leh Sub Centres dang pawh a tahtawla la sak that zel tura ruahman a ni a. Sialsuk PHC building thar sak zawh niin luah fel tawh niin, Health Clinic Centre 4 din thar a ni bawk.
Hei bakah Samlukhai internal road Black-topping turin PWD in ruahmanna a siam mek a, hna pawh thawh thuai beisei a ni a. Kum 2018 MLA election dawna an intiam tawh angin, Tlawngkual agriculture link road pawh tun term chhung ngeia laih tlang tum a ni bawk.
He huna khualzahawm NHM Director Dr. Eric Zomawia pawhin thu a sawi.