Ram sum dinhmun ngaihtuahin Mizoram tan sorkar hnathawk New Pension Scheme (NPS) aiin Old Pension Scheme (OPS) a zangkhai rih zawk avangin kumin MLA inthlanah an sorkar chuan OPS an kalpui dawn niin Congress party chuan an sawi.
Nimina Aizawl Press Club-a thu thar thehdarhtute an kawmnaah Congress thupuangtu, Dr Lallianchhunga chuan NPS hmangtu zawng zawngte tan OPS an pe vek dawn nia an lo sawi tawh chu thil tih theih ngei nia an hriat avangin, tuna Mizoram sorkarin sum leh paia harsatna a tawk mek chhawk zangkhai nan pawh OPS hi kalpui ngei a tul nia a hriat thu a sawi.
Dr Lallianchhunga chuan NPS-a sorkarin sum a senso zat hi tunah chuan kum khatah Rs vbc 45 vel a ni dawn tih sawiin, “Sorkar hnathawk lak belh apiangin kum tin a pung zel dawn a, Mizoram ang state rethei zawk tan chuan zawh loh hun a awm thei hial dawn a ni,” a ti.
MNF kaihhruai Mizoram sorkara sum leh paia harsatna lian tham a awm mek laia NPS tana kum tin cheng vbch 40 chuang sen a ngai ziah hi sorkar tan phurrit tak a tling a. Hemi chhawk zangkhaina tha tak chu OPS-a let leh a nih thu sawiin Dr Lallianchhunga chuan, “Mizoram tan chuan NPS aiin OPS hi a zangkhai rih zawk,” a ti.
September, 2010 atangin Mizoram sorkarin NPS a hman tan chauh avangin NPS hnuaia pension-a chhuak an la awm tam lo va, sorkar tan zangkhaina tur a awm lo a. NPS tihtawp a nih hian OPS-a senso a pun phah vakna tur tunah chuan a awm chuang lo tih a sawi.
Congress thupuangtu chuan sorkar laipui hnuaia thawk tam takin NPS an duh loh avangin NPS-a kalpui mek hi a khua leh tuite that tlanna ber tura ennawn turin finance secretary, GoI kaihhruaina hnuaiah April 6, 2023 khan committee din a nih thu sawiin, “Sorkar laipui hnuaiah pawh OPS-ah kan let leh vek lo vang tih a sawi theih loh. Kum 2003-a advertisement chhuah hmanga kum 2004-a sorkar hnathawk an lakte pawh OPS hi a hmantir leh mek a ni,” a ti.
Congress party-in OPS-a let leh nise tia an aupui hi vote zawnna ngawr ngawr a ni lo a, ram sum leh pai dinhmun chhe zual zel tur venna tur a nih thu a sawi a. “Tuna Mizoram dinhmunah chuan OPS leh NPS pek kawp hi kan zo lo a, sum leh pai dinhmunin hma a sawn lehzual deuh huna kalpui chauh chi-ah kan ngai a ni,” a ti bawk.