AZL: ZPM party leh Mizoram BJP chuan Chakma Autonomous District Council inthlanna neih tura Rengkashya biala BJP party official candidate Amit Kumar Chakma tualthihnaa mawhphurtute a rang thei ang bera man turin Mizoram sorkar an phut.
Nimina thuchhuah an siamah ZPM chuan Amit Kumar Chakma tualthihna an dem thu sawiin, “Hetianga nunrawnna thiltih hi Mizoram politics-a thil thleng khât tak a ni a, kan dem tak zet a ni,” tiin, tun hnuah hetiang thil hi thleng nawn tawh lo se an duh tih an sawi a. He pawikhawihnaa mawhphurtu chu man chhuak thuai turin sorkar an phut thu an sawi.
BJP Mizoram pawhin an party candidate tualthihna chungchangah Mizoram sorkarin tun thlenga tumah man a la nei lo chu mak an tih thu leh hriatthiam har an tih thu thuchhuah an siam a. He thihna a mawhphurtute a rang thei ang bera man tur leh na taka hremna pek an nih ngei an phut thu an tar lang bawk.