AHla copy thubuai vanga lungawi hlei thei lo Ed Sheeran chu US court chuan a hla, ‘Thingking Out Loud’ hi Marvin Gaye hla, ‘Let’s Get It On’ copy chhawn a ni lo, tiin a lam hawiin thutlukna a siam.
British singer-songwriter hian 2014 kuma a hla hit tak hi ama irawm chhuak liau liau a ni a, tu hla mah a copy loh thu a sawi fo tawh.
Heti chung hian Gaye-a hlaphuahpui chuan Sheeran, Warner Music Group leh Sony Music Publishing te hian copyright palzutna chungchangah sum tam tak an ba, a ti ve thung.
New York-a thubuai rip tak hmachhawn hi a hautak a, amah Sheeran ngei pawhin a kham takzet. He thubuaiah hian thiam loh chantir a nih chuan rimawi khawvel chhuahsan vang vang a tum thu thlengin a sawichhuak hman hial.
Manhattan federal court-a inkhin buainaah khan, “Thiam loh chantir ka nih chuan, a zo, a tawp hmai a ni mai. Ka chawl vang vang nghal ang,” a ti.
Jurors-in thiam loh pakhatmah a nei lova, mi hla a copy lo tih lam hawia thutlukna a siam veleh Sheeran hi a dingchhuak nghal a, a team member te kuah chuk chukin lawmthu a hrilh mawlh mawlh. Court pawn lamah Sheeran chuan a lam hawia thutlukna siam a ni ta chu, “Zep thu a cheng lo, ka lawm takzet a ni,” a ti.
Sheeran hian tun tum loah pawh hla copy thubuai a lo hmachhawn tawh a, 2017 kuma a hla hit, ‘Shape of You’ chungchangah London High Court-ah a lo kal zak zak tawh a ni.
Tarlan fo tawh angin, tunhnai chho vel atang khan zaithiam/hlaphuah thiam lar tak takte’n hla copy chungchangah thubuai hla buai an hmachhawn nak nak hlawm a. Katy Perry leh Taylor Swift te chenin an bang lo.
Court thubuai hmachhawn hi a namai lova, rilruhah chu thuhran.. hun a hekin, sum leh pai tam tak sen theihna a nih vangin milar, sum ngah tak tak tan paw’n a thawven thlak loh hle a, hei vang hian an hlaphuah/siam lai te chenin video-in an record thlap thlap thin.
Hei hian nakin hnu lehzelah inkhin buaina leh inpuhmawhna pumpelh theih a nih beisei a ni a, lar vanglaia hmingchhiat leh thubuai neih te hi pumpelh hram hram an duh thin a ni.