An club mihrang Diego Maradona hoa kum 1990 daih tawha Scudetto an hawn hnu khan Naples khaw team hian Italian Serie A title lak tih ni an nei leh thei ta lo vang vang kha a ni a, kum 33 chhung teh meuh an nghah hnuah Ningani zan khan hun ropui tawngbaw lehin, Udinese muala 1-1 draw chu top flight title lak nghehna atan SSC Napoli tan a tawk a, Italy ram hmarlam team tantute’n khelmuala Maradona lem chuanna puanzar lianpui vai phe hlup hlup chungin champion an lawm!
Udinese 1-1 Napoli
Udene khaw stadium Dacia Arena inkhel ngaihvena Naples khawpui a sahawk laiin tan atanga minute 13-na lekah Sandi Lovric chuan rin loh takin Udinese hmahruaina goal a thun nawlh a, an sikhat phurh hi champion fel tawh tura draw tal mamawh mikhual team-in chawlhlawk hmain an sut zo lo.
Second half erawh a dan a dang ta zak a, minute 52-na lekah Victor Osimhen chuan Napoli siphurh sutna goal thunin league khelh nga zet la awmah Naples khaw club hian a vawithumna atan Serie A title an la fel.
Inkhelh banah Napoli boss Luciano Spalletti chuan, “Neapolitans hlim hmel hmuh hi kan tan a tawk a ni. Hun harsa tak karah kan mite’n he hun hi nghakhlel takin an thlir a, champion lawm turin dikna an nei chiang a ni. Hlimna boruak kan chhawpsak thei hi kan tan pawh thawk huaina tham a tling.”
Nat hun a liam ta…
Napoli kuta title lut hmasa pahnih kha Argentina legend Maradona an kawl hun laia an sualchhuah ve ve niin, kum 1987 leh 1990-a Scudetto lakpuitu hming chawiin an stadium pawh Stadio Diego Armando Maradona an tih phah hial a, mahse, khami hnu lamah khan hun harsa an tawk chho mawlh mawlh a, sum lama tlakchhiatna (financial decline leh bankruptcy)-te tawk chhoin, top flight lamah pawh an inhamtang zo lo mai ni loin kum 2006 khan Serie C lam lamah an khawsa leih leih!
Chumi hnu season liamta hnuhnung 11 chhung khan Coppa Italia trophy tum thum chang bawk mah se Napoli fans awh ber Scudetto erawh an tan vana rah ang a la ni!
Zawi zawia insiamtha chho zelin, squad-ah player tha an senglut hret hret a, tunah chuan superstar rual khat kawi ve thei leh tawhin, league game 26-a goal 21 thun thei Nigeria forward Victor Osimhen bakah goal 12 thuna assist vawi 10 nei tling tawh Georgia winger Khvicha Kvaratskhelia an kawl a; AS Roma a hrual laia Coppa Italia title pahnih sualchhuak tawh Spalletti hi coach tawnhriat nei tha ni bawkin, kum 64 mi hi Serie A la thei manager upa ber a rawn ni chho ta hial a nih hi.
Karliamta khan khelh ruk hmabak la nei chunga title la fel thei dinhmunah Spalletti hian a team dinpui tawh mah se an khaw club dang Salernitana an inhnehtawkpui avangin an nghah leh det a ngai a; mahse, Ninganiah point khat thawkchhuakin, table-a anmahni hnaihbertu Lazio nen khelh nga la awmah point 16 ngawta an inthlauh tak avangin Rome khaw team tan Napoli hmakhalh ngaihna a awm ta lo a, Napoli club chanchina a vawithumna atan Serie A title a hmin.
Osimhen goal khat a tawk
Udinese an luhkhung hma hauhin Napoli fans lam chuan Naples khuaah party an huaihawt tan der tawh a; Udine khuaa an team inkhel lai thlir turin Stadio Diego Armando Maradona-ah fans an inhnawhkhat hung a, a hmun ngeia an team champion lai thlir turin fans 10,000 chuangin Italy hmarlam an pan bawk a; mahse, beisei loh takin si an phur hmasa a, half time thlenga away fans-in lawmna tur an neih loh hnuah Udinese keeper Marco Silvestri-a’n tha zeta Kvaratskhelia goal tur a dansakin a hrinchhuah corner atangin Osimhen chuan mikhual siphurh a sut a, tah tak chuan champion lawmna party a nung thar leh!
Full-time whistle a rik rualin khel-mualah Napoli fans an chim lut a, Udine leh Naples khaw lamah champion lawmna thawm a chawl lo.
Champion-na goal langsar thawhtu Osimhen chuan kum tam tak an nghah hnua an hlawhtlinna mak a tih thu hahipa sawi chungin, “Neapolitans kuta Scudetto hlan theih boruak hi awlsam taka theihnghilh leh mai mai mi rual a ni lo ang a, kan dam chhung chauh tal chu he thinlungah hian a bet tawh dawn a ni.”