Top-ranked Iga Swiatek chuan Ningani semi-final hnuhnung zawkah 6-1, 6-1-a Veronika Kudermetova sawp chungin Madrid Open final a lut a, chu hmuna lo nghaktu world number two Aryna Sabalenka nen tunhnaia a zawna tumhih final an khelhna ni turin vawiinah champion nih an inchuh leh dawn.
A tumkhatna atana Madrid final khel tur Swiatek hi head-to-head record lamah Belarusian aiin a chungchung a, vawili an intum tawha la chak vek a nihna record kha a belhchhah thei dawn em kan thlir ang.
April hla tawp lam khan Pole Swiatek hian Stuttgart Open final-a Sabalenka hi 6-3, 6-4-in a hneh a, May thla tawp lama French Open title a kawl lai humhim a tumna turah kawngdik zawh zelin, 12th seed Kudermetova laka hnehna nuamsa nen Madrid-ah Belarusian bawk a su zui leh dawn.
Aryna Sabalenka hian Ningani semi-final match hmasa zawkah 6-4, 6-1-in Maria Sakkari a paltlang a; Greek nula nen khan an vawikaw intawnna ni tawhin, clay leilungah bik erawh a vawikhatna a ni a; Greek ninth seed laka kum 24 mi Sabalenka win-loss record chu 6-3 a ni.
Kum 2021 Madrid-a champion Sabalenka hian kumin January thla khan Australian Open title changin, vawiinah season kal laia a title pahnihna beiseiin a la hneh ngai loh world number one Swiatek a tum leh dawn.
Tun hi kum 40 hnuah clay season-a world top two player-te’n clay season khat chhunga final vawi-hnih an khelh leh vawi-khatna tur niin, kum 2013 khan Serena Williams leh Maria Sharapova tum hnih an intawng a; a hma leh kum 1984 daih tawh khan Martina Navratilova leh Chris Evert-te chuan clay season khatah WTA ran-king-a a sang pahnih luah chungin final tum hnih an lo khel ve tawh bawk.
Madrid Open men’s singles quarter-final pa-khatah Ningani vek khan world number five Stefanos Tsitsipas a tlawm a, Ger-many lucky loser Jan-Lennard Struff chuan 7-6(5), 5-7, 6-3-in a vaw tla.
Tunlaia khel tha tluang tak Struff hian nizan result tarlan hman lohah qualifier Aslan Karatsev tumin, anni pahnih hi a tumkhatna’na Masters 1000 semi-final thleng an ni a; Russian hian last four lut turin Ni-ngani inkhel dangah Chi-nese Zhang Zhizhen chu 7-6(3), 6-4-in a paltlang.
Mipa singles semi-final inkhel dangah world number two Carlos Al-caraz chuan a kum 20 piancham herchhuah ni takin Croatian 17th seed Borna Coric a hma-chhawn ve bawk.