May 4, Ninga zana English Premier League 2022-23 inkhel awmchhunah Palinaa awm mek Manchester United chu Brighton & Hove Albion lakah vanduaithlak takin an tlawm a. Red Devils hian champions League khel phak turin inelna hautak zawk an hmachhawn zui a ngai dawn.
Amex Stadium-a inkhelah hian mual neitu Brighton leh an mikhual Manchester United hi an inhnehtawk viau a. Goal thun tuma innawr tawn chhen chungin goal a lut har viau a. Hun pangngai zawh hnu, hun pek belh pawh a tawp dawn ruai tawh tihah Brighton hian penalty atangin chakna goal an thun thei hram chauh.
Brighton leh United te hi an inhnehtawk ngei tura ngaih a nih tawh laiin hun tawp dawn tepah United defender Luke Shaw handball vangin Brighton in penalty an hmu. He penalty hi Argentina midfielder Alexis Mac Alliste chuan minute 90+9-ah a pet goal a, chakna goal a thun. United laka chakna goal thuntu Alexis Mac Alliste khan season kal mekah Brighton tan penalty vawi ruk pet tawhin a pet goal vek a. Season kal mekah penalty-ah bik amah aia hnuhma nei tha awmchhun chu Manchester City forward Erling Haaland chiah a ni a. Haaland hian penalty vawi sarih pet tawhin, a la pet goal vek a, mi bik a nihzia a lantir chiang hle.