Mizoram sorkar chuan Manipur-a Mizo awmte hruai hawna tur bik thlawhtheihna hire tumin hma a la mek a, Chief minister Zoramthanga’n tangkhangte hruaina turin thlawhna pakhat aia tam pawh tir thei tura ruahmanna an neih thu a sawi.
Manipur-a tual chhung buaina chhuak mek chungchangah hian Mizoram sorkarin Mizote himna tura hma a lak thu hi chief minister chuan nimina Central YMA hruaitute nen an inkawmnaah a sawi a, “Kan mite himna tur leh hruai chhuah dan tur pawh hmanhmawh taka ngaihtuah mek zel a ni a, kan mite la chhuaktu tur thlawhnaah vawi khata an len loh pawhin vawi hnih pawh kan tir mai ang,” a ti.
Mizoram sorkara Home Secretary H Lalengmawia chuan nimin khan Manipur-a buaina chungchang Mizoram sorkar hmalaknate a puang a. Manipur-a Mizo awmte thiar chhuah nan Indigo Airbus A-320 biak mek a nih thu te, hei hi a rem lo palh takin thlavengah Indian Air Force lam pawh an dawr thu a sawi a, Airbus hi an hire theih a nih chuan Imphal-ah tirh nghal tur a ni tih te, chu thlawhna hmang chuan Mizo tangkhangte chu Mizoram panpui nghal tum a nih thu te a sawi a. Manipur-a Mizo awmte hruaia a tul anga buaipui turin sorkar mi pawimawh pathumte Manipur-ah tirh an ni dawn tih a sawi.
H Lalengmawia chuan Mizoram leh Churachandpur inkar lirthei service chu tihtawp a ni lo a, Manipur atanga lirthei hmanga Mizorama rawn haw eng emaw zat an awm tawh thu a sawi a, he buaina avanga Mizorama rawn tlan lut pawh mi 16 an awm tawh thu te, Manipur leh Mizoram inkalpawhna Tuivai lei venghim turin police an duty tawh thu te a sawi a. Manipur-a tual chhung buaina thleng mekin eng chen nge a awh dawn a hriat loh avangin Mizo mipuite lo inpuahchah ve a tul thute a sawi a ni.
Manipur-a Mizo awmte hnen atanga thudawn danin buaina hi a la sosang a, nimin khan Zohnahthlak mi paliin Imphal-ah he buainaah hian nunna an chân leh a, Imphal-ah hian nunna chân an awm nual tawh.
He buaina kal mekah hian Imphal-ah Kristian biak in eng emaw zat tihchhiat a ni tawh a, Zohnahthlakte biak in chauh ni lovin hnam hrang hrang lawina Roman Catholic biak inte an khawih bakah Meitei Kristian biak in pawh tihchhiat a ni a, Rongmei biak in pawh tihchhiat zingah hian a tel tih thu dawn a ni.