CADC area-a Member of District Council (MDC) inthlan lo awm turah Rengkhasya constituency-a BJP party official candidate Amit Kumar Chakma chu mi dang kut tuarin Ningani zan khan a thi.
Thudawn danin Ningani khan CADC inthlan lo awm turah BJP party chuan Lokhisury-ah rally-a neiin Rengkhasya lamah an haw a, la cham thenkhatte’n buaina tenau tawkin, an buaina tawh chungchangah Amit Kumar Chakma hian Vasei Police-te nen remna siam tura Lokhisury khua an kal chu kut an lo thlak a ni.
Amit Kumar Chakma baka an bula lo awm ve mi parukin kut tuarin, hliam tenau an tuar vek a. An zingah Lokhi Ram Chakma hian a luah hliam tuarin a dinhmun a that loh deuh avangin hmunpui lam zawk panpui niin an sawi.
Amit Kumar Chakma leh a thiante kutthlaktu hi mi pathum vel nia sawiin a ni a, an zingah MNF official candidate Prema Ranjan Chakma pawh telin Vaseikai Police ten man nghalin Lawngtlai lamah phurh chhoh nghal nia thudawn a ni.
Amit Kumar Chakma hi Rengkhasya Constituency ah 9th CADC khan INC party atanga thlantlin niin, CEM nihna a lo chelh tawh a, 10th CADC-ah INC atang bawka thlantlin a ni leh a, mahse, MNF-ah a lut a. Tun tum CADC inthlan lo awm turah hian Rengkhasya Constituency-ah BJP official candidate a ni bawk.
CADC inthlan lo awm tura candidate nunna chan an awm avangin CADC inthlanpui neih lai hian Rengkhasya bial erawh inthlanna kalpui theih a ni dawn lo va, State Election Commission in hun remchang a ruahman hunah inthlanna hi neih a ni ang.