- MC Lalthianghlima
MNF party media & publicity Dept. chuan ni 29.4.2023 (Inrinni) ah khân Aizawl press club ah thuthar thehdarhtute an kawma. MNF media & publicity dept. thu puang chhuaktu Pu David Zohmangaiha chuan Gurugram khawpuia Management Developement Institute hotu pakhat Prof. Rajesh K. Pillania kaihhruaina hnuaia zirchianna ah Mizoram chu India ram state zînga hlim ber ah thlan a nih thu leh April ni 20. 2023 khân an puan chhuah thu a sawi a. A sawi zêlna ah “India ram thang chhuak khawp a rorêlna tha kalpuia, state hlim bera min siamtu he sorkar Pu Zoramthanga kaihhruai hi MNF chuan kan chhuang takzet a ni” a ti bawk.
India ram khawpui pakhata Institution pakhat hnuaia Prof. Rajesh K. Pillania kaihhruai hnuaia zirchiangtute’n India ram state hlim ber a min lo thlang a nih chuan, a lawmawm viau mai. Chutihrual chuan MNF media & publicity Dept. in state hlim bera min thlangtute’n min thlan chhana Kohhran, tlawmngâi pâwl leh mipui thlawh khûma “State hlim bera min siamtu he sorkar Pu Zoramthanga kaihhruai sorkar hi MNF chuan kan chhuang takzet a ni” an ti daih mai kha, a mak a thil an chîklo hle a ni.
Vawiina sorkar kan hrawn mêk avanga India ram state zîng a hlim bera min thlang dawn a nih chuan, min thlangtute hian min zir chiang tâwk lovin, min hre chianglo hle a nih loh vêk pawhin MNF media & publicity Dept. hian India ram state hlim bera min thlan chhan hi, an hrechianglo hle a ni bawk ang.
Engvangin maw? E le, kan sorkar hrawn mêk hnuaiah hian kan state-a tlawmngai pâwl lian ber YMA chuan “Eirukna leh hlemhlêtna a reh theih nân chak zawka hmalak” a rêl mup mup a. Chu mai a la ni lo, kan state-a Kohhran lian ber synod inkhawmpui chuan Mizoram-ah eirukna nasa zawka do a rêl hial bawk. Tin, vigilance Dept. leh central YMA thawhdûnin vigilance awareness week 2022 hawnna leh eirukna leh hlemhletna do-na atâna Aizawl khawpuia walkathon an buatsaihah chuan, an âu rual dual dual a “Eng nge kan ram hmêlma lian ber? – Eirukna”, “Zoramah hmasawnnân enge kan do ngai? – Eirukna” , “Khua a tlai hma hian eirukna leh hlemhletna do turin hma i la ang u” tih thute leh heng kan tarlan bakah hian eirukna do a tul zia âu hla tam tak an nei bawk.
India ram state hlim bera chêng, sorkar kaihhruaina hnuaia Kohhran leh tlawmngai pâwlte thu chhuak leh an au hlate khi, a hlim awm loh ngawt mai. Hetih lai kara MNF media & publicity Dept. in India ram state hlim ber kan nih theih chhana vawiina sorkar vanga an sawi hi a maka, kan ram Kohhran leh tlawmngai pâwl, mipuite kuhmûma pâr tum leh thangthat lak tum an ang hle a ni.
Chu mai a la ni lo, OMB hmanga vawi tam tak cheng vaibêlchhe têl kan pûk leh mipui health care chu sorkar-in cheng nuaih tam tak min bat saka, mipui chuan kan tihtur rinawm taka hlen chhuakin, health care scheme-a kan inziah luh rualin, pawisa kan chhun luh tur chu sorkar ah kan pe nghala, kan damloh mangan laia hman tur kan health care pawisa chu kan sorkar hian min pe mumal thei lova, min bat sak nasa êm êm a, mipui kan manganga kan hlim lo a nih hi. Heti chunga Institution pakhat hnuaia zirchiangtu pawl pakhatin India ram state zinga hlim bera min thlan chhana MNF media & publicity Dept. in Pu Zoramthanga kaihhruai sorkar vanga an sawi hi, mipui zah lohna lian takah kei chuan ka ngai hial a ni.
Tin, kan sorkar hnathawkte’n a hun takah an thawh hlawh an lâk theih nân hmâ an la vut vut bawk a. Kan larsap (Governor) chuan, kan sorkar chu hmasawnna hnathawh project thenkhat thawh chhûng rei lutuk leh pawhsei a ni fo chu thil fello a nih thu a sawi hial a. Chhimbial lamah lah kan minister-in mipui hmaa thupha chawi ngai khawpin kan sorkar a che bawk. MNF media & publicity Dept. hian, state hlim bera thlan kan nih chungchanga MNF sorkar vanga an sawi ta mai hi thil an chîk tawklo hle niin ka hria a, an tawngvai nasa hle in ka hria. State hlim bera thlan kan nih chungchangah hian, sorkar-in rorêlna tha a kalpui vanga state hlim bera an sawi dawn a nih chuan, state hlimlo berte zinga tel tur kan ni hial âwm e.
State hlim ber nih hi kan duhlo a ni lo, amaherawh chu he thil hi Kristian state kan nih vangte, sorkar kal sual thui lutuk tur vêngtu Kohhran leh tlawmngai pâwl kan neih vangte, mipui mimir that vangah ka ngai a. MNF media & publicity dept. hian thuchhuah an siam duh a nih rau rau chuan Kohhran, tlawmngai pâwl leh ram mipuite chungah hian lawmthu sawi ta zawk se thil inhmeh takah ka ngai zâwk.
Kan ram hi a chhe vek kan ti hauh lova, nimahsela kan ram hi tih chhiatin a awm mêk niin a langa, kan chhiatna lai hi kan zêp emaw kan thup mâwi lui tlat a nih chuan tun âi hian kan chhe thûk zêl ang tih a hlauhawma. Kan chhiat mêkna hi zêp leh thup lova kan zavaia lungruala kan siam that a ngai a nih hi, kan hliam leh kan natna hi a dam hunah chuan, state hlim bera mite puan sak chawp ngai lovin, a takin kan hlim ngei ang.