Aizawl : Mizo National Youth Front (MNYF) Headquarters chuan Manipur a kan Zo hnahthlak unaute buaina tawh chungchang ngaihtuahin nimin khan thutkhawm hmanhmawh an nei a, Manipur state a kan chipui leh unaute thavang hauhna leh Manipur state a remna leh muanna a awm thuai kan duhzia lantirna inkhawm (peaceful demonstration) chu vawiin ni 6th, May, 2023 (Inrinni) chhun dar 12 hian Vanapa Hall kawtah neih nise an ti.
Nimin a MNYF rorel inkhawm ah hian MNF thalai Vice President Zodinpuia chuan, Zofate hi kan duh vang ni lovin ram pathum India, Myanmar leh Bangladesh ah te thendarh a awpbehin kan awm a, ram hran a kan awm avang hian kan nunphung leh chetzia lo danglam deuh a nih pawhin unau kan nihna hi bo lo, tanpui kan ngaih hunah chuan khawvel ramri kham (International boundary) hian unau kan inhmangaihna hi min thenhrang tur a ni lo, a ti.
Tunhnaia Manipur tualchhung buaina ah kan unau leh kan chipui tam takin nunna an chan tawh a, an chenna in halchhiatsak an ni a, kristiante sakhua hmun thianghlim kan Biak In thlengin sawisak a tawk ta mai hi ‘Pathian leh kan ram tan’ tih lungphum nghet taka vuantu MNF chuan pawi kan ti takzet a, kan thinlung a rum a ni, tiin.
MNYF Vice President chuan, Chief Minister Pu Zoramthanga leh Rajya Sahba MP Pu K.Vanlalvena ten kan unaute thlavang hauh a rang taka hma a la nghal leh, Mizoram sawrkar ang pawha tihtheih awm a piang rang taka ti tura ruahmanna a siam nghal chu lawmawm a tih thu a sawi a, Chief Minister Pu Zoramthanga hmalakna hian Manipur mai bakah khawvel ram hrang hranga cheng Zofate a ti lawm hle a ni, a ti a. MNF President leh Chief Minister Pu Zoramthanga hmalakna avangin Manipur tualchhung buaina pawhin zia awm lam a pan thuai a beisei thu a sawi bawk.
Nimin a MNYF Headquarters’ extended meeting-in a ruahman ang in, vawiin a unaute thlavang hauhna inkhawm (peaceful demonstration) neih turah hian political party kan nihna te dahtha in Mizo mipui, ram leh hnam hmangaihtu zawng zawngte tel vek turin MNYF chuan a sawm takzet che u a ni, tiin an thuchhuahah chuan an tarlang bawk.