Aizawl: Pawl pathum – Rorelna Dik Duhtute, Mizoram First leh Mizo Hnam Inkhawmpui te buatsaihin nimin khan Vanapa Hall-ah Rorelna Dik Duhtute Inkhawmpui vawi khatna neih a ni a, neih chhunzawm zel an tum.
He inkhawmpui hi Rev Vanlalrova Khiangte-in a kaihruai a, inkhawmpui buatsaihtu pawl pathum aiawhte theuhin thu an sawi bakah Mizoram Peoples’ Forum (MPF) General Secretary Rev. Lalramliana Pachuau, Mizo Theological Association (MTA) President Rev. Rosiamliana Tochhawng ten an sawi.
Thusawitute chuan rorelna dik a taka kengkawh turin sorkar tha siam a ngai a, assembly house-ah pawh rorelna dik taka kalpui thinte an thut a tul thute an sawi a, tawngkam mai loa a taka ram tan thawktu roreltu ramin a mamawh thute an sawi hlawm.
Inkhawmpui buatsaihtute zinga mi, Rorelna Dik Duhtute chuan an hmalak tawhna leh an hmachhawpte an tar lang a, political party hrang hrang hnenah rorelna dik kalpui a nih theih nan ngenna thu an lo thlen tawh thu te, ram rorelna tha leh fel a awm theih nan mipuite thawhpuia sawmna campaign neih an tum thu te, political party hrang hrangten manifesto an siamte chu bihchian an tum thute an sawi.
He hunah hian thupui hrang hrang – ‘Rorelna dik a awm theihna tura ringtu mawhphurhna’, ‘Ram rorelna dik a awm theihna tura thalaite mawhphurhna’ leh ‘Pathian nen rorelna dik kan nei thei’ tih thupui te an zirho bawk.