MPCC President Lalsawta’n an party-in MLA candidate atana ram siam tha duh tak tak an dap tih a sawi.
Nimin khan Congress Bhavan, Lunglei-a party hruaitute nena an inkawmnaah thu sawiin Lalsawta hian, “Sorkar tum ve hrim hrim vang ringawtin lehkhathiam sang tak leh mi lar emaw ringawt kan ramin a mamawh ber lo,” tia sawiin, Congress party chuan MLA candidate atan mi dik, thil tha duh leh huaisen, ram siam tha duh tak tak an dap tih a sawi.
Lalsawta hian an sorkar chuan ‘Tang Puihna’ an kalpui dawn a, hemi atan hian NLUP-ah pawh sum an dah theih atang hian budget-ah sum a dah theih niin a sawi a. Tang puihna erawh awmze nei leh ruahmanna fel tak nen an kalpui dawn nia sawiin, “Kan ram siam that nan tanpui ngaite tanpui hi thil tul a ni,” a ti.
Mizo mipuite’n sorkar thlak a, sorkar tha siam an duh a, chumi tur chuan an insiamthat a, an danglam ngam a tul tih sawiin, “Tunah hian kan danglam hle tawh a ni,” MPCC President hian a ti a. Pathianin kawng mam ringawt zawh tur ni loin, harsatna patlang turin a duh a, chu chu ringtute tih tur a ni tih sawiin, amah ngei pawh Pathianin hriselna a pek avangin harsatna tam tak paltlanga ram siamtha turin ke a pen zel dawn tih a sawi.
He hunah hian Congress MLA hlui Lalawmpuii leh MPYCC President Dr Lalmalsawma Nghaka bakah LDCC President KL Chhawnzauva te’n thu an sawi bawk.