Mi rawkah chuan ‘hlawhtlinna lian tak’ tia sawi theih a ni ang a; mahse, an hlawhtling famkim lo thung a, a buaithlak khawp mai.
Peru ram lailia Huancayo khawpuia dawr rawktu pathumte hian pheikhawk dawr rawkin an pho chhuah lai pheikhawk 200 chuang zet an la chhuak a, hlawhtling an inti khawpin a rinawm a; mahse, a ding lam vek chauh a lo ni!
Pheikhawk an rukte hi a vaiin $13,000 man zet a ni a; mahse, a hralhna tur chu an vân zui viau a rinawm.
An hmanhmawh lutukin a remchang chang an phih thla tih a hriat reng a, a inkhingin nge khing lovin an lak tih pawh an en mumal hman lo a nih ngei hmel hle.
An chetla lai hi surveillance camera an dah pawhin a la fuh a. BBC-in a tar lan dan chuan video-ah hian rukrute hian zanlaiah dawr shutter kalhna tala an tichhia a, tricycle hmangin bawm lian tak takin pheikhawk brand hrang hrang an phur chhuak a ni.
Tual chhung police chief Eduan Diaz chuan, “A hmunah hian finfiahna tha tawk tak tak kan hmu a. Rukrute hian pheikhawk hi a ding lam theuh chauh an ru chhuak a ni,” a ti.
“Footage leh an kutze thla atangin anmahni hi chhui chhuah thuai a nih kan beisei,” tiin Diaz-a hian thuthar lakhawmtute hnenah a sawi a ni.