Kumin nipui thawt ruala a Paris St Germain contract neih lai hmang zo ve tawh tur Lionel Messi chuan inremna thar a ziak dawn lo tih a chiang tawh a, a kal lehna tur inrinsiakna a len chhoh mek laiin a club hlui Barceloa tiat zeta thawm neilian leh Paris club-in hremna an pek phah hialna Saudi Arabian club Al-Hilal chuan beng muka liam zawih zawih khawpa tamin Argentina World Cup-winning captain hi an thlem tih hriat a ni a, hnar zo tak ang maw?!
Tunhnaiah PSG thu loin Messi chhungkua hian Arab ram an tlawh thut a, a nupui Antonela Roccuzzo leh an fate nena Arab mihausa pakhat thla laho lai chu social media lamah hmuh tur a awm zui bawk a; heti chinah hian thu a la tawp mai lo a, Messi lam hnai tak pakhatin Ningani mai khan Reuters hnenah thu bengverh zet mai hrilhin, Al-Hilal chuan season thar atan PSG forward hi sum tam mangkheng hlawh turin an sawm!
Dan ang thlapa Saudi club-in an dawr bak chu he thu buatsaih lai thleng hian hriat theih chinah dan pangngaia Messi dawrtu an la awm lo tih Reuters thu lakna hian tarlang telin, Al-Hilal ngamna zat hi chiang taka tarlan ni lo mah se Argentine media-te chuan kum khata US dollar maktaduai 400 vel bawr hlawh turin an sawm an ti hem mai!
Al-Hilal chuan an sumdawnna kalpui hun chhung piahlama engngemaw sawi tura an ngenna an hnawl a, Argentina ram lama an sum sawichhuah chungchangah ‘comment’ an la pe duh lo.
Tarlan tawh thin angin, kum 35 mi lai ni ve tawh Messi hi a naupan lai atanga a club ni rei tak Barcelona lama kirleh tura sawirik a nih bakah United States-a an top flight Major League Soccer club Inter Miami nen sawizawm a ni bawk.
Boruak hrang hriat tur a awm laiin tunkar Thawhlehni mai khan French sports daily L’Equipe chuan Paris St Germain-in Messi an ‘suspend’ thu a tarlang a, PSG chuan a season thumna atana contract pawhsei an tum loh thu chanchinbu hian a ziaklang tel bawk.
Messi hi tourism lam buaipui turin Saudi ambassador atana ruat a ni ve pah reng reng a, chutih laiin a elpui kumhlun Cristiano Ronaldo pawhin sum tamna Saudi Arabia-ah nikum December thla khan Al-Nassr club zawmin, kum khata a hlawh tur chu US dollar maktaduai 220 vel tehreng nia hriat a ni!
Messi lamhnai takin Reuters a hrilh danin ‘suspend’ an tihtluk hma lawk khan Argentine forward hian PSG hnenah tun season bak Paris-a khawsak zui a tum tawh loh thu leh a chhuah duh chhan pawh a club vawn mek chuan hmachhawp (project) mumal tak a neih loh vang tih a hrilhtlang dawt!
Reuters thulaknain a tarlan zel danin, PSG hian Thawhtanni khan training an awl a, he hunawl chuh hian Messi chu a zinchhuak mai niin a sawi.
PSG lamhnai ve thung chuan Reuters hnenah bawk Messi hnaih takin a report hi a pha thung a, Thawhtannia training session awm reng chungin Argentine chu French club hnen atanga phalna la hmasa loin a zinchhuak tiin a puh!
Paris St Germain thulakna hian season tawpa PSG chhuahsan a tum thu player-in club a hrilh tih chungchangah erawh comment a pe lo thung.