Chawlhkar khat chhunga Serbia-a inpawngkahna vawi hnihna thlengah mi pariat kah hlum niin mi 14-in hliam an tuar a, a titu nia puh mipa man a ni.
Inpawngkahna hi Nilaini zan lai pelh hnu, Ningani khaw var hmaa thlen niin an khawpui ber, Belgrade chhim lam km 60 vela hla khuaah a ni a, a kaptu hi car-a tlan chungin a kap a ni.
Interior ministry chuan zau taka zawn a nih hnuah Zirtawpni zing hma takah man nghal a ni tih a sawi.
Nilaini maiah khan mipa naupangin Belgrade-a sikulah naupang pakua lai a kap hlum tawh a, Serbia-a kum tam tak chhunga inpawngkahna rapthlak ber a tling.
President Aleksander Vucic chuan hetiang thil a thlen hnu, Zirtawpni tukah khan silai thununna turin venhimna kalpui dan thar a puang nghal.
Interior ministry chuan a hnuhnung zawka inkahnaa a titu nia hriat hi Kragujevac khawpui bulah man a ni tih a sawi.
Man tuma zawnna hi a huam zau hle a, police officer pawh 600 chuang an inhnamhnawih niin tual chhung chachinbute chuan an tar lang a. A pu inah a lo tawm niin Serbian broadcaster RTS chuan a puang bawk.
Zirtawpni zing hma takah khan Serbian chanchinbute chuan inkahna hnuhnung zawk thlenna, Mladenovac leh Dubona khua chu special police-in an thleng tih an tar lang.
Thlalak darah chuan police officer-ten car lo tiding zelin silai hmet puaktu hi an zawng a. Helicopter, drone leh police patrol thahnem tak rawih an ni bawk.
Tual chhung chanchinbuten interior ministry puan an tar lan dan chuan mi kaptu hi kum 2002-a piang a ni a, Ningani zana Dubona-a police officer nen an inhnial buai hnuah a automatic silaiin mi a kap ta chiam a ni.
Dubona-a cheng, Milan Prokić chuan ina a awm laiin silai ri a hriat tih Radio Belgrade 1 hnenah a sawi a. “A lungchhiatthlak a, a rapthlak bawk a. Inah kan inkalh hnan nghal a, keimahni lam hawiin a kap lo hlauh a ni,” a ti.
Hetih lai hian car atangin silai hi hmet puah a ni a, mi pariat kap hlumin mi dang eng emaw zatin hliam an tuar bawk.
Hliam tuarte hi damdawi inah dah luh vek an ni a, an zavai hian kum 2000 hnu lama piang vek niin RTS chuan a tar lang.
Mi pahnih, kum 21 leh 23 mi chu zai nghal an ni a, an dinhmun a tha lo hle nia sawi a ni.
Zirtawpnia thuthar lakhawmtute a kawmnaah Serbian president chuan a kaptu nia hriat hian neo-Nazi symbol chuanna T-shirt a ha niin a sawi a, a bak a sawi zui lo.
President Vucic hian inkahna chu ‘kan zavaia min beihna’ tia sawiin venhimna kalpui dan tur thar a puang nghal a, heng zingah hian police officer 1,200 lak belh pawh a tel.
Hei bakah hian silai permit pek chhuah thar tawh loh te, dan lova ralthuam kawl hremna na zawk leh silai neitute an rilru a fit tawk em tih endik thin pawh a tel.