Tottenham captain leh an si nghak ni bawk Hugo Lloris tan season a tawp a. Lloris hian hliam malpui hliam vangin Tottenham tan inkhel a hmachhawn thei tawh dawn rih lo.
April ni 23-ah Newcastle United lakah 6-1 ngawta Tottenham an tlawm tum khan kum 36 mi Lloris hian a khel tluan thei lova, first half chiah a khel. Hemi tum hian malpui hliam vangin second half a khel chhunzawm thei lova, a hliam hi rin aiin a lo na a, season kal mekah a inlan thei tawh dawn lo. European competion hmachhawn tuma tan khawh mek Spurs hian hun pawimawh takah club ai a awh thei dawn lova, Crystal Palce, Aston Villa, Brentford leh Leeds United a hmachhawn thei dawn lo.
Tottenham tan inelna hrang hrangah vawi 447 zet khel tawh Hugo Lloris season a tawp fel tak thu hi manager lailawk Ryan Mason chuan a sawi chiang a. Hun pawimawh takah an chhawr thei lo tur chu an tan channa nasa tak a nih thu a sawi tel bawk. Lloris hmunruak hi Fraser Forster-a’n a hnawh khat tura ngaiha ni. London hmar veng club lian Tottenham hi pasarihnaah an awm mek a. Champions League khelh phak beiseina tlemte an la neih chawk nung turin an khelh hmabakah tha zual zawka an inlan a ngai dawn.