Russia-a Wagner Group hotu chuan ralthuama inmil lohna awm mek avangin Ukrainian khawpui, Bakhmut atanga Nilainia inthiar chhuah a tum.
He thuchhuah hi a fighter thi ruang tam tak kianga a kal kual paha video-a an lakah sawiin Russia thuneitute chu ralthuam pek belh turin a ti.
Russia hian a hlut dan sawina hrang hrang awm khawpui hi lak tumin thla eng emaw zat an lo bei tawh.
Yevgeny Prigozhin chuan a thusawi hi defence ministry beng thleng ngei se a duh.
“Shoigu! Gerasimov! Khawiah nge… ralthuam? He hmunah hian mahnia inpein an kal a, in pisaa in thut lai khan i tan an thi asin,” tiin thinrim takin a sawi
Defence Minister Sergei Shoigu leh Chief of the General Staff Valery Gerasimov chu Prigozhin-a hian a ân khum a ni ber.
Prigozhin-a hi mipuia invawrh lar duh tak a ni a, tun hnaiah a larna hi a tlahniam nasa.
Kar hmasa khan Russian pro-war blogger chuan Bakhmut-a Wagner fighter-te hian silaimu an tlachham nasa tawh a, sang tam tak an mamawh niin a lo sawi tawh.
An mamawh hi pek an nih loh chuan tualthattu pawla mite hi inhnuhdawh emaw, awm zuia thih mai an hmabak tih Prigozhin-a chuan a sawi.
Prigozhin-a hian a sipaite chuan Bakhmut-a May 10 thleng la awm an remti a, hei hi Russia-in Thawhlehnia Victory Day an lawm tur nghahna a ni.
February khan a sipai thite thlalak post-in an thih chhanah army chief-te a lo puh tawh.
Hemi tum hian sipaite chuan Wagner group-in laipuimu an tlakchham loh thu leh hmatawnga awmte hnena an pek thin an tihpun nasat thu an sawi nghe nghe.