Aizawl: Electric Veng Branch YMA hnuaia Literature & Education Sub-Committee buatsaihin nimin khan Electric Veng YMA Hall-ah Career Fair neih a ni a, Aizawl North III bialtu MLA C Lalmuanpuia’n a hawng a, zirlaiten an hlut hle.
Fair hawngtu, bialtu MLA C Lalmuanpuia chuan zirlaite tana tangkai tur Electric Veng YMA-in an buatsaih chu lawmawm a tih thu a sawi a, “Zirlaiten tangkai takin hmang se, hlawhtlinpui ngei se,” a ti a. “Ram leh hnam humhalhna tha tak chu lehkha zir a ni,” a ti a, zirlaite chuan ram leh hnam hma ngaia an zirlaite tha takin zir se, ram leh hnam tan rawn hlawhtling ngei se tiin duhsakna a hlan a ni.
Career Fair-ah hian dawhkan pakua – Arts, Commerce, Science, Military/Force, Medical, ITI, Polytechnic, Law, Engineer-ah mi thiamte an thu a, hetah hian zirlaite kal kualin an duh angte an zawt a, mi thiamten an duh zawngte lo sawipuiin zir dan kal hmangte an lo sawipui a ni.
Electric Veng Branch YMA chuan YMA kumpuan ‘Ram leh hnam humhalh’ tihhlawhtlinna kawng khat atan zirna uar leh lehkha zir dan dik zawk inkawhhmuh hi a ngai pawimawh hle a, chumi an hmalakna atan chuan Career Fair hi an buatsaih ta a ni.