King Charles leh Queen Camilla chu ruahman lawk angin ni Britain leh a awp ramte chunga lal ni turin Inrinni khan lallukhum khumtir an ni ta a. Ni chhinchhiahtlak, khaw dul leh ruah sur cherh cherh karah hian Buckingham Palace leh a chhehvel leh lukhum khumtirna biak in velah mi an pungkhawm tam hle.
Westminster Abbey-a lallukhum khumtir an nih hnuah London khawpui an hrut kualna kawng, Mall an tihah chuan ruah sur mah se mi an tam tak zet.
King leh Queen hian Palace bathlar (balcony) atangin anmahni hmuh châk leh lawmtu mipui pungkhawmte an hmu a, hetih lai hian chung lamah RAF Red Arrows chuan a sen var leh pawl a phuh chhuak bawk.
Bathlara mipui hmaa inlanna hunah hian Prince Harry erawh sawm ve a ni lo.
Duke of Sussex hi abbey-a inkhawmnaah chuan a tel a, a unaupa, Prince William thutna hnung hnung lehah a thu a, tun hi a memoir, Spare a tihchhuah hnuah chhungkuaa an inhmuh lehna hmasa ber a ni a. Inkhawm zawh veleh US a pan lehnghal.
King ni hi an ram sanaa chawhma dar 10:00 atanga tan niin Westminster Abbey panin sakawrin a hnuh Diamond Jubilee State Coach-in an kal a, mi tam takin lo lawmin sipai 1,000-in zahna chibai an lo buk bawk.
Rinna lama hruaitu leh commonwealth hruaituten lallukhum khumtirna bul hi tanin King leh Queen ten an zui.
Darkar hnih awh inkhawm hi kum 70 hnua hetiang inkhawm a awm leh hmasak berna niin TV atangin mi maktaduai telin an thlir a, abbey-ah mi 2,300 an tel bawk.
Charles-a lu-a crown nghal a nih chiahin ‘God Save the King’ tih thawm chu biak in chhung leh pawn atang a ri tluar tluar a, UK pumah laipui kah a ni bawk.
Westminster Abbey-a inkhawmah hian mi lar zingah lemchan thiam, Emma Thompson leh US zaithiam, Katy Perry te pawh an tel.
US First Lady Jill Biden leh a tunu, Finnegan pawh car pathum inzuiin an thleng a, President Joe Biden erawh UK-ah a zin ve lo. French President Emmanuel Macron leh Ukraine First Lady Olena Zelenska te pawh an tel a. Prime Minister Rishi Sunak leh Commonwealth ram hruaitute an kim hle bawk.
Foreign Office chuan ram hrang hrang 90-a an hruaitu lu an tel niin a sawi.
King hi abbey a thlena a tawngtaina hmasa berah, “Rawngbawlsak tur ni lovin, rawng bawl turin ka lo kal a ni,” a ti.
Charles hi lukhum khumtirnaah hian rimawi leh thu tiam zawng zawng chu hmanlai thil tih dan ang veka kalpui a ni a. Hmun ngai zen zen loh, orb leh sceptre leh Sword of State pawh a keng a ni.
Inkhawm lai hian King zar hliahin holy oil-in Archbishop of Canterbury-in a theh a. Hei hi mi mal thila tih niin Palace chuan a pawimawh thu leh Thiltihtheihna leh Pathian inkar a nih thu an sawi.
King hliah a nih lai hian zaipawlin Handel-a hla, Zadok the Priest an lo sa a, hei hi lallukhum khumtirna hunah hian kum 1727 atanga an lo sak tawh thin a ni.
Prince William pawhin King Charles-a laka rinawmna thu a tiam a, a biakah a fawp bawk.
Palace pana an haw leh lamah King leh Queen thar hi Gold State Coach hmangin The Mall zawhpui an ni a, sipai tam takin an zui bawk.
Kum 1953-a Queen lalllukhum khumtir a nih leh hnua a vawi khatnaah hian sipai 4,000 leh military band 19 zet an inlan a ni.
English weather an tih, ruah sur sep sep chuan The Mall-a lal thar lawmna a tibuai lem lo hle a, a changin Mexican wave an siam thin.
A hma zan atanga he hun nghaka tlaivara awm tawh tam tak pawh an awm nghe nghe.