United States-a Texas khawpui, Dallas hmar lama bazarpui (mall)-a mi pakhatin silai a hmeh puahah mi pariat an thi niin emergency services-in an sawi.
Inkahna thlenna, Allen Premium Outlets mall atang hian mi tam tak hmun himah hruai chhuah an ni tawh a, thil thleng hmutute chuan a kaptu hian tum bik pawh nei lovin a kap pawp pawp niin an sawi.
Silai puak thawm hriaa a hmun pantu police officer-in a kaptu hi a kap hlum ve nghal a, officer hi a hranpaa koh a ni lo.
Thi zinga thenkhat hi naupang nia sawi a ni a. Hliam tuar mi pasarihte chu damdawi inah lak niin an zinga pathum chu an dinhmun a tha vak lo.
Allen Fire Chief Jonathan Boyd chuan silai kaptu telin, mi pasarih chu a hmunah an thi a, damdawi inah mi pahnih an thi leh tih a sawi.
Allen Police Chief Brian Harvey chuan mall-a lo awm ve, silai ri hriaa tlan police officer hian a kaptu nia hriat chu a kap hlum niin a sawi.
Thite hi kum nga leh 51 inkar an nih thu damdawi in thupuangtu chuan a sawi.
Thil thleng hmutu thenkhat chuan a kaptu hi a dum veka inthuamin raldo thuamin a inthuam niin an sawi a. Kah hlum a nih hnua thlalak darhah chuan a ruang bulah AR-15 style rifle a let reng tih a lang.
Texas Governor Greg Abbott chuan inkahna thleng chu ‘sawi thiam phak baka lungchhiatthlak’ a nih thu a sawi a, puih an ngaihna apianga tual chhung thuneitute puih turin state sorkar a inpeih tih a sawi bawk.
US police chuan finfiahna an dapnaah thil thleng lai video-a lo la fuh an awm a nih chuan FBI hnenah inhriattir thuai turin an ngen.
Video darhah chuan mall chhunga awmte chu silai a rik lai hian car hunna pana an tlan chhuak chum chum lai a lang bawk.