Duke of Sussex chu Westminster Abbey-a a pa lukhum khumtirnaah hian tel ve mah se inkhawm zawh veleh a haw nghal.
Biak in chhungah hian a unaupa thutna hnung hnung lehah daih a thu bawk.
Prince hi a nupui, Meghan-i tel lovin a thleng a, a nupui hi US-ah awmin an pa pawh hi inkhawm zawh veleh hian Heathrow atangin a thlawk haw lehnghal a ni.
Harry-a hi Buckingham Palace bathlar atanga lal chhungkuain mipui chibai tura an inlannaah pawh tel tura sawm a ni lo nia hriat a ni.
Prince Harry hi Zirtawpni khan UK a thleng a, Los Angeles panin Inrinni zan dar 7:30-ah British Airways thlawhna hmangin a haw lehnghal niin PA news agency chuan a tar lang.
Inkhawm a zawh khan amahin car-in abbey pawh a chhuahsan nghal a ni.
Minute 90 hnuah Buckingham Palace balcony-ah ve thung chuan King leh Queen te chu inlanin Royal Family-a thawk laite an tel bawk a, Prince leh Princess of Wales leh an fate pawh an tel.
Prince Harry-a nupui, Duchess of Sussex hi an fate nen Los Angeles-ah an awm a, an fapa, Prince Archie kum li tlin lawmna lam a buatsaih ve thung.
US chanchinbu, Page Six chuan Prince Harry-a hi a fapa piancham lawmnaa tel hman ngei tura haw leh turin a inbuatsaih sa niin a lo tar lang tawh.
Harry hi inkhawmah hian morning suit hain medal a tar a, a cousin Princess Eugenie leh a pasal, Jack Brooksbank te nen tlar thumnaah daih an thu a, a patea, Duke of York, Prince Andrew pawh an thutpui.