Chief Minister Zoramthanga’n Manipur-a tual chhung buaina chhuak meka Zohnahthlakte himna ngaihsak turin Manipur chief minister a ngen thu sawiin, Mizoram sorkarin Zohnahthlakte chu riltama an awm a phal lo a, a tul angin ei leh inah pawh tanpuina pek a inhuam thu a sawi.
He thu hi Inrinnia The Zozam Times-in a pisaa a kawmnaah a sawi a, chief minister chuan, “Manipur-a buaina chhuak chungchangah Chief Minister N. Biren Singh nen kan inbepawp reng a, Churachandpur-a Metei awmte sipaiten hmun hima an thiar chhuak angin Imphal-a khawsa Zohnagthlakte pawh an himna ngaihtuah a, a tul chuan Churachandpur lamah te pawh thiar chhuak turin ka ngen a, Manipur CM pawhin ‘theih tawp kan lo chhuah ang e’ tiin min chhang,” a ti.
Mizoram mi leh sa, Manipur-a tangkhangte himna ngaihtuahsaka thiar chhuah hna kalpui mek karah Manipur-a awm nghet Zohnahthlakte himna tur pawh ngaihtuahin sorkar laipui hotute an dawr reng tih Zorama chuan a sawi a, “Manipur-a Zohnahthlak awmten harsatna an tawh lohna turin hmalak zel kan tum a, sorkar laipuiah pawh pui turin ngenna thlen zel Mizoram sorkarin a tum,” tiin a sawi.
He buaina chhuak avanga Manipura Zohnathlakten ei leh barah harsatna an tawh tan chungchangah puih tumna an nei em tih zawhna pawh chhangin Zorama chuan, “Riltama an awm kha kan duh lo,” a ti a, Mizoramin harsatna a tawh lai pawhin khi lamin tanpuina an rawn pek thu te, buhfai, petrol emaw thil dang an mamawh chuan pek an inhuam thu a sawi a, hetihlai hian tanpuina pek kawngah hian Manipur sorkar nena indawr tawn ngai a nih thu a sawi.
Manipura buaina thleng mek chin felna kawngah Mizoram sorkar chu lo inrawlh ve ngawt a rem lo tih sawiin, “Sawm loa lo intah luh ve ngawt kha mi lawm loh kan ni thei a, sawm kan nih phawt chuan remna siama chin felsak chu kan in huam reng,” a ti bawk.