Manipur-a buaina chhuak mekah state tam tak chuan an mite hruai haw nan thlawhna hranpa an ruahman bakah helpline an siam hlawm.
Maharashtra Chief Minister Eknath Shinde chuan Pathianni khan Manipur-a thil thleng chu an ngaihven reng thu leh zirlai awm mekte hruai haw turin an tih theih apiang an ti zel dawn tih a sawi.
“Zirlai 22 an awm a, an zinga pahnih, Vikash Sharma leh Tushar Awhad chu ka be tawh a, an lo thlawh haw theihna tur kan buaipui a. Engmah hlau lo tur leh him taka an haw theihna tur kan ruahman tih ka hrilh,” a ti.
“Maharashtra Chief Secretary Manoj Sounik leh hotu lian dangte pawh ruahmanna siam turin ka bia a. Ngun takin kan vil reng,” a ti bawk.
Andhra Pradesh sorkar pawhin zirlaite hruai haw nan Inrinni khan Delhi-ah helpline leh control room an din.
“Manipur sorkar leh tual chhung thuneitute nen pawh kan indawr reng,” tiin Andhra Pradesh sorkar chuan a sawi.
Hetih lai hian West Bengal Chief Minister Mamata Banerjee pawhin Manipur-a Bengal zirlai awmte biakpawh an tum thu leh helpline number an siam thu a sawi.
“Manipur atangin kohna ka dawng a. Manipur mipui leh he hmuna tang mek ram chhung hmun hrang hranga mite himna ka ngai pawimawh hle a ni,” tiin Banerjee-i chuan Twitter-ah a tar lang.
“Bengal sorkar chuan tangkhangte hruai chhuah nan Manipur sorkar a dawr reng a. Chief secretary-in a vil,” a ti.
Nagaland sorkar chuan bus 22 hmangin an mite 600 vel an hruai haw tawh tih Deputy Chief Minister Y Patton chuan a sawi a. Tripura sorkar pawhin an zirlaite hruai hw nan thlawhna pahnih an ruahman tih Chief Minister Manik Saha-a’n a sawi.
Airports Authority of India (AAI) chuan mite hruai chhuah nan leh sipai thawn luh belh nan an nih theih nan ruahmanna a siam bawk.
Manipur-ah hian hmun eng emaw zatah Pathianni khan curfew hlih a ni a, hetih chhung hian sipaiten drone leh helicopter hmangin an vil reng thung.
AAI hi Manipur sorkar nen indawrin an khawpui, Imphal-a Bir Tikendrajit International Airport-ah nileng zankhuaa thlawhna a chet theih dan tur an ruahman a. Internet service tihtawp ni mah se AAI hian tumhmunah LAN internet pawt lutin thlawhna ticket hauh leh print nan an hmang a, tangkhang tan ei leh in tur an ruahman bawk.
Manipur Chief Minister N Biren Singh chuan Inrinni zan khan an buaina thleng mek chungchangah all-party meeting a ko va. Manipur-ah hian venhim hna thawktu company 14 vel dan an nih bakah sorkar laipuiin company dang 20 a tirh luh belh tawh bawk.
Tun thlengin tharum thawhna thlenna hmun atang hian mi 20,000 chuang hruai chhuah an ni tawh tih thuneitute chuan an sawi.