Aizawl: Congress Legislature Party (CLP) Leader Zodintluanga Ralte chuan Manipur buaina thleng mekah an party chu inhuam thui hle tih sawiin, Zohnahthlak chi peng hrang hrangte tanpuina tur kawngah engtik lai mahin Congress party an tlanchhiat ngai dawn loh thu a sawi.
Chakma Autonomous District Council (CADC) inthlan lo awm tura campaig beihpui thlak mek, Zodintluanga hian Inrinni khan Longpuighat-a vantlang inkhawmah thu sawiin, “Tuna Manipur-a chi leh chi inkara buaina sosang tak chhuak mek avanga kan unau, kan thisen zawmpui Zohnahthlak chi peng hrang hrangten harsatna leh manganna namen lo an tawk mek hi pawi ka ti takzet a. Kan unaute tanpuina tur kawngah engtik lai mahin Congress party kan tlanchhe ngai lo ang,” a ti.
Congress party chu remna leh muanna duhtu an nih thu sawiin Zodintluanga hian, kum 20 zet Mizoram chu rambuaina namen lo hnuaia a awm hnuah remna leh muanna a awm theih nan Congress sorkar namthluin lalthuthleng a kian a, Mizoram mai ni lo India ram pumah remna leh muanna awm se, ram chhunga cheng mipuite inngeih leh inlungrual taka khawsak ho dial dial chu an duh dan ber a nih thu a sawi.
Zodintluanga hian kumin MLA inthlanpui lo awm turah MNF President Zoramthanga, chief minister ni bawk chuan a dinna tur bial a la hre lo nia sawiin, “MNF party an sorkar loh turzia lanna chu an President Pu Zoramthanga’n dinna tur bial a la hre lo hi a ni,” a ti.
Inkhawmah hian West Tuipui bialtu Congress MLA Nihar Kanti Chakma pawhin thu a sawi bawk.