Aizawl: Congress Legislature Party (CLP) chuan nimin khan Manipur buainaa Zohnahthlak harsatna tawkte puihna atan, a tul apianga hman turin Central YMA hnenah Rs nuai 1 an hlan.
Thawhtanni khan CLP hruaitute hi Tuikhuahtlanga Central YMA pisa-ah lengin tanpuina tur sum an hlan.
CLP Leader Zodintluanga Ralte chuan Manipur-a harsatna nasa tak tawk mek Zohnahthlakte chu an hre reng a, buaina leh harsatnain kiansan thuai se an duh thu an sawi a. An tana sorkar leh tlawmngai pawl hrang hrang hmalaknate an thlawp thu a sawi.
He buaina hi tumahin politics-a hamthat lakna atan hman an duh loh thu leh sorkarin a mamawh phawt chuan CLP-te hi an tih ve theih tawkah tlanchhiat an tum loh thu leh an tih theih a tlem emaw, a tam emaw, Zohnahthlakte tan an inhawng reng tih a sawi.
Zodintluanga chuan Manipur tual chhung buaina chu hnam thil a nih ang ngeiin Mizoram sorkar chu all party meeting emaw, session emaw koa Zohnahthlak unaute tana hma lak dan tur rel ho nise, hmalakna a chak lehzual a beisei tih sawiin, “Kan duh loh thil a thleng a ni tawh si a. A thleng ta sa sa he thil thleng hian kan inunauna tichakin, ‘Zohnahthlakte inhmangaihna tizualtu ni mawlh rawh se’ tih hi kan duhthusam a ni,” a ti.
Manipur buaina avanga Zohnahthlak Mizorama raltlan mekte pawh Zofate Jerusalem-ah an thleng tih hriaa inthlahrung mai lo tura chahin, “Manipur lama kan unau la awm mekte pawhin in unaute kan awm tih hre reng ang che u. Zofate hi he harsatna hmang hian kan inpumkhat lehzualin kan ringin kan beisei tlat a ni,” a ti bawk.