Nilainia India chhim lam, Karnataka-a assembly inthlan atan political party-te chuan campaign an bei ngawrh mek zel.
Prime Minister Narendra Modi-a pawh campaign hian a tei nasa hle a, ni 10 chhungin vantlang inkhawm vawi 17-ah telin roadshow vawi nga a nei bawk a, BJP-in thuneihna an chan chhunzawm leh theih nan a bei nasa hle a. A tih ngai loh ang takin Modi-a hian khawpui, Delhi chhuahsanin zan hnih lai chhim lam state-ah hian a riak nghe nghe.
Eptu party lian ber, Congress party pawh an president, Mallikarjun Kharge leh Gandhi chhungkaw hovin beihpui an thlak a, hmun tam takah vantlang inkhawmah thu an sawi.
Tun tum assembly inthlan hi nakumah inthlanpui ber neih a nih tawh dawn avangin a pawimawh a, mi thiamte chuan inthlanpui tur hriltu a ni thei tih an sawi.
BJP worker-te chuan Modi-a thawh chhuah hnem chuan beiseina a siamsak nasa hle.
Inthlan hnuhnung ber, kum 2018 khan BJP hian bial 104 lain sorkar an siam thei lo deuh va, Congress leh Janata Dal Secular (JDS) tangdun an sorkar.
Kum khat lek hnuah Congress leh JDS MLA eng emaw zat bângin sorkar a tlu a, BJP-in kum 2019 inthlanpuia hnehna an chan hnu lawkah state-ah pawh an kaihhruai sorkar a din phah zui.
“BJP hi an chak zo lo a nih chuan chhim lamah an tan kawng a ping dawn tihna a ni,” tiin Azim Premji University-a political science professor A.Narayana chuan tun inthlan a pawimawhzia a sawi.
“An chak hlauh a nih erawh chuan thenawm – Telangana, Andhra Pradesh leh Tamil Nadu thlengin an worker-te an phur dawn thung,” a ti.
Prof Sanjay Kumar pawhin BJP hi an chak lo a nih chuan state dang inthlan hmabak leh nakuma ram pum inthlanah nghawng a nei dawn niin a sawi ve bawk a. “Congress hi an hlawhchham leh hlauh a nih chuan an worker-te a nghawng na khawp ang,” a ti bawk.
Tun tum inthlan hi helai vela BJP hruaitu lawk ber ni reng, BS Yediyurappa campiagn-na tel lova inthlan hmasak ber tur a ni a. Chief minister hlui hi kum 2008-a thuneihna an chan theihna bul leh kum 2019-a sorkar ding lai paih thlaa an sorkar theih chhan kha nia ngaih a ni.
Karnataka-a hnehna chan hi BJP ang bawkin Congress tan pawh intihlenna tur a ni thei ve tho tih mi thiamte chuan an sawi a. A bikin hmar lam – Rajasthan, Madhya Pradesh leh Chhattisgarh-ah kumin kumtawpah an inthlang dawn a, hemi atana worker-te tihphurhna tur niin an ngai.
Congress hian Karnataka-a hnehna chang tur khawp chu an la ni lo deuh niin psephologist Kumar chuan a sawi a. Tual chhunga hruaitu erawh an chak tha tawk niin a sawi.
“Ram pum huapa hruaitute an chak lo. Ram pum huapa Congress hruaitu zingah hian vote ko kal thei an awm lo,” a ti.
Hei tak hi Modi-a pawh rim taka a thawh chhan niin ani chuan mipui a hip niin mi thiam dangte pawhin an sawi.
“BJP hian prime minister a nihna ringawt pawh hi an hlawkpui thei,” tiin political analyst, Bhopal-a Jagran Lakeside University-a pro-vice chancellor ni bawk, Prof Sandeep Shastri chuan a sawi.
“State leh ram pum inthlan pawh ni sela, an party hian Modi-a ringawt pawh hian vote a hui teuh thei tih an hria,” a ti.
Karnataka-ah hian Nilainiah mipuiin vote an thlak dawn a, Inrinniah chhiar a ni ang.