India chhim lam, Kerala-a khualzin phur lawng chetsualna thlengah mi 22 vel an thi.
Pathianni zana thil thlengah hian a tuk thlengin chhanchhuah hna thawh niin thi zat hi an pun rin a ni a, lawng hi chirh dum hmun atanga pawh chhuah a ni.
Lawng chhawng hi chuang an tam lutuk vanga chesual ta a nih thu Malappuram district assistant superintendent of police Abdul Nazar chuan Reuters a hrilh.
A chuang thei zat let zeta tam, mi 50 chuang an chuang a, Pathianni zan khan a let a ni.
Police chuan lawng neitu lakah hian thubuai an ziak lut nghal a, amah hi a tlan bo rih thung.
Prime Minister Narendra Modi chuan Twitter-ah thil thleng pawh a tih thu tar langin, ‘nunna hlu tak chân a ni hian min tina tak zet’ a ti.
A chuang tam tak chu lawng hnuaiah an tang a, zan a nih bawk si avangin chhanchhuak tura chet chak a har niin tual chhung chanchinbute chuan an tar lang a. Thi zingah hian chawlh hmang zirlai naupang leh hmeichhia an tel.
Hliam tuar mi pali chu damdawi inah lak niin an dinhmun a tha lo hle niin Kerala Sports leh Fisheries Minister V Abdurahiman chuan a sawi.
Chin hriat lohva awm zat chiang taka hriat theih a la ni lo va. Thuneitute chuan chhiatna thlen chhan leh lawng hian permit a nei felfai reng em tih an chhui dawn tih an sawi.
Chhanchhuahnaa tel, Shameer chuan Mathrubhumi news channel hnenah ‘lawng hi a let thawk’ tiin a sawi a. “Ruang pali ka hmu a, tute mahin life jacket an ha lo,” a ti.
A chuang dangte pawhin life jacket hi an ha lo vek niin dam chhuakte chuan tual chhung chanchinbute an hrilh.
Chetsualna bul lawk khuaa cheng, Ambika chuan Manorama news channel hnenah khawmual pana lawng a kal lai chuan eng a thim thut a, lawng chu a pil a, tanpuitu kova a chuangte an au zui niin a sawi.
Ambika-i hian police a ko nghal tih a sawi a. “Mahse, a thim vek tawh a, engmah tak tak tihtheih a awm lo,” a ti.
India-ah hian lawngleng chesual hi a tam a, hei hi a chuang thei zat aia tam chuan leh a himna tura tih zawm that tawk loh vang a ni fo.