Manipur tual chhung buaina avanga Mizoram mi leh sa tangkhangte Mizoram sorkar hmalaknaa hruai haw mi 52-ten nimin chhun dar 12 khan Lengpui Airport an thleng a. He thu buatsaih lai thleng hian Manipur atanga raltlan mi 2,056 an tling tawh.
Airport-ah hian Mizoram sorkar aiawhin Social Welfare & Tribal Affairs minister Er. Lalrinawma, H&FW Board Vice-Chairman Dr ZR Thiamsanga, Aizawl Deputy Mayor R. Thanglura, Home Department Additional Secretary Joseph H. Lalramsanga bakah Central YMA hruaituten an lo hmuak.
Minister Er. Lalrinawma sawi danin Manipur-a tangkhang, Mizorama rawn haw duh in-report mi 196-te thlawhtheihna ticket laksak an ni a. Pathianni khan zirlai 50 chuan Imphal chhuahsanin thlawhna hmangin Guwahati hruai thlen an ni a. Guwahati-a Deputy Resident Commissioner-in a tul ang angte a lo buaipui a. Zirlai 25 chu nimin tlai dar 5 vek khan Mizoram panin bus hmangin an rawn chhuak leh a, zirlai 25 dangte chuan kawng dangin Mizoram an rawn pan ve leh a ni.
Thawhtannia thleng mi 52-te hian nimin tlai dar 4:10 khan Imphal chhuahsanin Kolkalta an thleng a, Joint Resident Commissioner hovin an lo dawngsawng a, anni hian nimin chawhma dar 10:30 khan Kolkata chhuahsanin Mizoram an pan a ni.
Nimina Mizoram thlengte hi RIMS a zirlai mi 37 leh chhan dang avanga Imphal-a tangkhang mi 15 an ni a. Pathianni tlaia Guwahati atanga bus hmanga haw mi 25-te pawhin Aizawl an thleng tawh bawk.
Sorkar thuchhuahin a tar lan danin nizan dar 8 thleng khan Manipur atanga sahimna zawnga Mizorama lut Aizawl district-ah mi 402, Champhai district-ah 59, Kolasib district-ah 757, Serchhip district-ah pali, Khawzawl district-ah pasarih leh Saitual district-ah 827, an vaiin mi 2,056 an awm a ni.