Aizawl: MNF party-in nimin khan an pisa, Mizo Hnam Run-ah chhung inkhawm an nei a, thusawitu, MNF Adviser J Malsawmzuala Vanchhawng chuan Mizoram himna leh Zohnahthlakte himna thu-ah MNF a tlan chhe ngai lo niin a sawi.
MNF Publicity Board Vice Chairman ni bawk hian Mizoram himna leh Zofate himna thuah hian MNF sorkar a tlanchhe ngai lo a, an mite thlavang huak takin an hauh ngam zel tih sawiin, “Congress hunlai, kum 2018 March thlaa zirlaite thlavang hauh ngam lova kut tawrhtir ang chi kha MNF sorkar kalphung a ni ve lo. MNF sorkar hnuaiah chuan July 26, 2021 khan kan police-ten silai hmetpuakin huaisen takin kan ram himna turin sorkarin hma a la,” a ti.
MNF President Zoramthanga, chief minister kaihhruai sorkar hi chuan kan ram, kan hnam leh kan sakhua himna turin huaisen takin, dinna nghet tak a nei tih sawiin J Malsawmzuala Vanchhawng chuan, “Manipur buaina thleng mekah sorkarin a tihtur diktak a hun takah a ti zel,” a ti a; Mizoram mi leh sa, Manipur-a tangkhang zawng zawngte sorkarin a ngaihven reng a, a hruai haw zel dawn niin a sawi.
MNF Adviser hian MNF hi Zofate rorelna pakhat hnuaia awm theih hun thlirtu an nih avangin an luah chin ramte an humhim zel a pawimawh tih a sawi a. MLA term khat pawh a liam hmaa, MNF sorkarin harsatna a tawh zozai hi tunhmaa la thleng ngailo, tunhnu zelah pawh a thlen leh rinawmlo khawpa nasa tih sawiin, “Pathianin hun harsa leh buaina tam tak hmachhawn tura MNF min dah tlat mai hi, kan hnam tana kan mawhphurhna san bikzia hi party mipuiten kan hriatnawn fo a tul a. Kan hotuten thutlukna dik tak an siam zel theihnan i tawngtaipui zel ang u,” a ti.
Mizo Hnamrun chhung inkhawm hi C. Manliana, Gen. Secretary, MNF Gen. Hqrs in a kaihruai a ni.