Aizawl: Member 20 awmna, Chakma Autonomous District Council (CADC) inthlan vawi 11-naah khan mipuiten tluang takin vote an thlak.
BJP candidate a thih avanga inthlan a remchang rih lohna, Rengkashya bial tih loh bial dang 19-ah nimin khan inthlanna neih a ni a, polling station 67 a awm a, buaina leh harsatna thleng lovin boruak muanawm tak hnuaiah vote thlak a ni.
Vote thlak zawh a nih veleh inthlan buaipuitute chuan venhimna tha tak hnuaiah EVM chu Chawngte an panpui nghal a, Civil SDO strong room-ah dah a ni a, May 11 hian Chawngte-ah chhiar a ni ang.
BJP, Congress leh MNF-te chuan bial 20-ah candidate an nei kim vek a, ZPM erawh chuan bial 13 an chuh a, bial 13 chu kil li atangin an inchuh a, bial sarih chu kil thumah an inchuh thung.
Rengkashya biala BJP candidate, CADC-a CEM hlui, Amit Kumar Chakma chu MNF leh BJP tantute intihbuaina thelh tura a kal chempuia sah hlum a nih avangin State Election Commission chuan he bial bik atan hian May 17-ah inthlan a buatsaih dawn a ni.
CADC huam chhunga MDC thlanna atan hian vote nei 34,474 an awm a, mipa 17,455 niin hmeichhia 17,019 an ni.