Labour Employment, Skill Development & Entrepreneurship (LESDE) Department buatsaih Mizoram Mega Job Fair chu Millenium Centre rooftop-ah nimin khan Deputy Chief Minister Tawnluia’n a hawng.
Tawnluia chuan Mizo thalaite’n job fair chu an chhawr tangkai a duh thu a sawi a. Mizoramah thalai lehkhathiam tam tak awmten an tuina leh theihnate hmang tangkai turin sorkar hnain a daih tawk lo tih sawiin, “Sorkar pawn lama hna tam takte chu dinchhuahpui tham, ei leh bara intodelhna tur leh eizawnna kawng tha tak a ni,” a ti.
Tawnluia hian Covid-19 leng vangin kum hnih chhung hna lak a khaihlak hnuah sorkarin thalaite hmakhua ngaiin zawi zawiin hna lak a kalpui chho mek tih a sawi a. Tun dinhmunah thalai hna neilo zawng zawng chan khawp a awm loh thu sawiin, sorkar pawn lama hna ngelnghet hmu thei tura tan lak a tul tih a sawi.
Deputy chief minister hian placement agency kalkhawmte chu Mizoram thalai hna neilote chu danin a phal chinah duhsak turin a ngen a. Tun lai thalaite chu an taima a, thawh hreh an nei tawh lo a, an hmaa hna chhawpchhuahte chu chhel taka thawh zel a pawimawh thu a sawi a. Skill development hmalakna hrang hrangah theihtawp chhuah tlan chuan kum reilo teah thalaiten ram an siam danglam ngei theih a rin thu a sawi bawk.
Mizoram Mega Job Fair-ah hian LESDE chuan ram chhung leh pawna sector hrang hrang atangin company lian leh changtlung tak takte sawm khawmin company-te chuan Mizoram chhunga hna zawngte tan hnathawh tur a chhawpchhuahsak.
Job fair kaltlang hian hna zawng lai leh company-te hian hamthatna insiam tawnin tual chhunga thalai hna nei lo leh zawngte hnena hna nghelnghet leh rintlak zawk tual chhung, ram chhung leh ram pawna an lo hmuh theih nan hun remchang an buatsaih.
Vawiin hian Fair hi chhunzawm leh a ni ang.