- Ruata
Hyundai Motor India chuan an micro SUV thar tur – Exter booking an la tan ta a. Hyundai hian he lirthei thar tur hi trim 5 – EX, S, SX, SX (O) leh SX (O) Connect-a siam a nih tur thu an sawi bawk a. A rawng tur pawh chi hrang hrang a awm dawn a, ‘Ranger Khaki’ rawng thar pawh a awm dawn a ni.
A khawl
Hyundai Exter mini SUV-ah hian 1.2L Kappa petrol leh 1.2L Kappa petrol khawl ring CNG te a awm dawn a. Heng khawl pahnih hi eng ang khuaah leh dinhmunah pawh awm se ‘performance’ tha tak pe chhuak thei tur an nih thu company lam chuan an sawi a, khalh nuam tak, he lirthei khalhtute tana hlimna thlentu tur a ni an ti.
Design
Exter micro SUV hmalamah hian parametric grille thar, H-signature LED DRLs, projector headlamp split setup nei leh sporty skid plate te kan hmu dawn a. Wheel arch leh side sill cladding te chu a design a thil langsar tak a ni awm e. Diamond cut alloy wheels, parametric design C-pillar garnish, floating roof leh shark fin antenna te a nei dawn bawk a, he lirthei hi a mawi dawn viau a ni.
A chhunglam
Hyundai mini SUV thar chhunglama kan hmuh tur hi official-a puanzar a la awm lem lo a, company lam chuan an la thup rih a. Mahse, a chhung awm dan tur leh a kentel hrang hrangte hi Grand i10 Nios nen a inan viau a beiseiawm a ni. A kentel turah hian smartphone connectivity thar ber hmang, touchscreen infotainment system lian zawk, ventilated front seat, automatic climate control, multi function steering wheel, electric sunroof, cruise control, keyless entry, ABS with EBD leh airbag 6 te a tel ngei beisei a ni a. Hei lo pawh thil tha tak tak a awm hmel a. Company lamin chiang taka an puanzar hun la nghah phawt erawh a ngai dawn a ni.
Hralhchhuah hun tur
Hyundai Exter hi thla 2-3 chhungin hralh chhuah theih beisei a ni a. A man hi cheng nuai 6 chho vel atanga intan tura beisei a ni a, cheng nuai 12 man chho vel thlengin a awm hmel a ni. Hei hi ex-showroom man a nih hmel a, on-road price-ah chuan hei ai hian a sang hret dawn a ni. Hetiang man anga tlangzarh a nih chuan ram chhunga Hyundai SUV man tlawm ber a ni thei dawn a ni.
A elpui tur te
India ram lirthei market-ah hian micro SUV kan tih huangah hian lirthei a awm ve nual ta a. SUV zingah chuan a te ber a tih theih a, tam tak hi chu hatchback car te ho huangah pawh rinluh theih mai tur te a ni nawk a, te fel et si, SUV ziarang nei tho si leh, a khalhtu tan pawha SUV anga ‘feel’ theih lirthei a ni a. A tlangpuiin a khan pawh a sang hret thin a ni. Hyundai Exter hi Hyundai SUV zinga tlawm ber a nih dawn mai bakah hian a te ber a ni dawn a. Market lama a elpui tur zingah hian micro SUV huanga company dang lirthei lo chhuak tawh ho – Tata Punch, Renault Kiger, Nissan Magnite, Maruti Suzuki Ignis leh adangte a rawn el dawn a ni.
Hyundai hi Mizoramah pawh lirthei company changtlung leh dealer pawh mumal taka awm a ni a. An lirtheite pawh an hralh hnem a. Tuna micro SUV lirthei thar lo chhuak tur pawh hi India ram market pumah pawh a chet that a beiseiawm hle a, Mizoramah ngei pawh mi nawlpui lirthei lei thin man huanga mi a ni dawn a, leitu a hmuh that viau a beiseiawm a. Lirthei huang hralh kal ni chho mek, micro SUV huanga lirthei thar, South Korea company lian leh changkang tak atanga a lo awm tur hi lirthei lam tuipui leh lei tumte tan chuan thu lawmawm tak a ni a. He huangah ngei pawh hian duhthlan tur a rawn tih tam phah ang a, a huang a rawn ti hausa sawt dawn a ni.