Aizawl : Aizawl District Level SEDP Committee chu nimin khan DRDO Conference Hall-ah an thukhawm a, Second phase first installment chu June ni 1 atangin tanpuina dawngtu te account ah thun hman beisei a nih thu tarlan a ni.
Thutkhawma an tarlan danin, Aizawl District chhunga SEDP Family Oriented Second phase dawng turin mi 16800 thlan an ni dawn a, hemi atan hian sum ruahman zat chu Rs. 84, 00, 00,000 niin, sum hi installment hniha pekchhuah tura ruahman a ni.
Second phase first installment hi June ni 1 atang ni 30 chhunga beneficiary te account a lut tura beisei a ni a. Second installment hi August ni 30, 2023 hmaa lut tura beisei a ni bawk.
Village level SEDP committee ten District Level Committee-a SEDp dawng tur list an thehluh hun tur chu May ni 12, 2023 a ni.
Thutkhawm kaihruaitu Aizawl Bawrhsap Dr. Lalhriatzuali Ralte chuan SEDP Phase II hlawhtling taka kalpui a nih theih nan uluk taka ngaihtuahna seng turin member zawng zawngte a chah a. SEDP line Dept hnuaia Deptt hrang hrang te chu beneficiary te theihtawp chhuah pui tur leh a vil zui kawngah te thahnemngai leh zual turin a chak bawk a ni.