India hmarchhak, Manipur-a tun hnaia chi leh chi inkara buaina chhuaka chenna in, lirthei, biak in leh temple beihna nasa tak thlenga thi chu mi 60 an ni tih thuneituten an sawi.
Manipur Chief Minister N Biren Singh-a’n Thawhtanni zana thuthar lakhawmtute a kawmnaah mi 200 chuang hliam an awm thu leh mi sang telin an in leh lo an tlansan phah tih a sawi.
Tharum thawhna hi ram leilung faten anmahni aia tam zawk hnamin tribal status an phut ve duh lohna lantira kawng zawh lian tak an huaihawt atanga intan a ni.
Manipur-ah hian mi cheng zinga 53% chu vel Meitei an ni a, anni hian kum tam tak chhung Scheduled Tribe category-a awm an ngiat tawh a. An awm ve a nih chuan ramngaw tha an luah ve thei ang a, sorkar hna leh zirna inah hmun hauhsak an ni ve bawk ang.
Scheduled Tribe-a awm sa, tlangrama cheng, a bikin Kuki-ten Meitei-te thil phut hi tihhlawhtlin a nih chuan an nu leh pa atang tawha an lo luah tawh ramngawte chu an chân mai dawn nia ngaiin an duh lo ve thung.
Thawhtanni khan Union Home Minister Amit Shah chuan news channel pakhat hnenah Manipur-a boruak tang tak chu thunun a nih tawh thu leh mipuite pawh boruak siam zawnga awm lo turin a ngen a. Manipur sorkar chuan kil hrang hranga mite rawn chungin an buainaah hian thutlukna a siam dawn tih a sawi bawk.
Buaina hmeh mih nan hian sipai sang chuang tirh luh niin district tam takah curfew puan a ni a, internet tihthih a ni bawk a. Kar hmasaa an buai zual lai phei chuan governor-in ‘thil liantham bikah’ chuan ‘a thlen laia kah nghal theihna’ thu a pe hial a ni.
Supreme Court chuan tharum thawhna thlengah hian state sorkar chu chawlhkar khat chhunga a tuartute puih leh chhawmdawl dan kimchang hrilh turin a hriattir.
Singh chuan mi 20,000 chuang, ‘relief camp-a dah khwamte chu hmun him zawkah an sawn’ tih a sawi a. Mi dang 10,000 vel chhanchhuah an ni tih a sawi bawk.
Hmun hima lak chhuah zingah hian hmeichhia leh naupang pawh thahnem tak an tel.
Tual chhung mi tam tak chuan an hma hun tur an thlir thiam lo hle hlawm a. “Himin kan la inhre lo,” tiin an khawpui, Imphal-a cheng, L Sanglun Simte chuan AFP news agency a hrilh a. Kuki tlangval kum 29 mi hi daia Imphal thlawhna tumhmunah a chhungte mi 11 nen an khawsa rih mek a ni.
Pathianni khan siupaite chuan ‘darkar 96 chhung zet civil mite chhan leh buaina hmet mit tura an thawh’ tawh thu an sawi.
Boruak daih tawh deuh mah se state chhung hmun thenkhat erawh a la tang hle tho.
Tual chhung mi tam tak chu army hmunah an la awm a, state dangte chuan an mite hruai haw turin rescue team an tir hlawm.
Maharashtra leh Andhra Pradesh sorkar chuan an mite haw nan thlawhna a hranpa an hmang.
Singh chuan venhim hna thawktute silai 1,000 chuang ruk a nih thu leh 200 vel an hmu let tawh a. A dangte pawh hi hmuh let tuma chhui zui a nih thu a sawi bawk.