Aizawl: Champhai district chhunga Ngur khuaah vawk pul hri, African Swine Fever (ASF) avangin vawk 67 a thi tawh a, a darh tur zel ven nan vawk damlo mekte chu suat vek a ni dawn.
Nimin khan Ngur khuaa ASF darh zel tur ven kawnga hmalak zel dan tur chungchang ngaihtuahin District A.H & Vety. Officer (DAH&VO) Dr. B.Lallawmsanga hovin Ngur VC leh NGO hruaitute an inrawnkhawm a, department leh khawtlang aiawh kalkhawmte chuan vawk damlo mekten vawk dangte hri an kai zel loh nan suat veka mumal taka phum bo vek ni se an ti a; a rang lama hma la tur leh a tul angte buaipui nghal thuai turin VC leh A.H & Vety. Department-te chu ruat an ni.
He huna an tar lan danin nimin thleng khan Ngur khuaa ASF leng mek avangin vawk 67 a thi tawh a, Vety. Department hmalaknain vawk damlo pasarih suat a ni tawh bawk a, tun dinhmunah hian vawk damlo eng emaw zat an la awm mek bawk a ni.
Ngur khua hi May 4 khan vawk hri lenna hmun ‘Infected Area’-ah puan a lo ni tawh a, he khua atang hian vawk lak chhuah emaw, lak luh emaw phal a ni lo va, vawk thi reng reng paih mai lovin chinai nen thuk taka phum tur a ni a, vawk talh leh vawk sa zawrh khap tlat a ni bawk.