Rajya Sabha MP K.Vanlalvena chuan nimin khan Prime Minister Narendra Modi hnenah memorandum theh lutin Manipur-a thil thlengte chhuitu tur Kristian MP-te telna Joint Parliamentary Team din tura ngenna a thlen.
K Vanlalvena hian May 2, 2023 atanga tun thlengin Manipur-ah Kristian biak in 42 aia tlem lo tihchhiat a nih tawh thu leh heng zingah hian tribal Kristiante biak in chauh tihchhiat a nih loh thu te, Meitei Kristian biak in pawh paruk lai tihchhiat a nih thu thlenin, “Manipur buaina hi Meitei leh tlangmite intihbuaina ringawt a ni lo tih hei hian a tifiah hle,” a ti.
Manipur atanga Kristiante umchhuah tum an awm tih a hriat chian a nih thu tar langin, “Hei hi India constitution lungphum pawimawh pakhat sawinghinna a ni,” a ti bawk.
Mizoram MP hian May 5, 2023 zanah Assam Rifles duty- ten Churachandpur-ah civil mi pawisawi lo hmeichhe pathum leh mipa pakhat an kah hlum thu a thlen bawk a. Heng thil tha lo chi hrang hrang titu chhuichhuaha hrem an nih theihna turin Kristian MP-te telna Joint Parliamentary team din turin prime minister hnenah ngenna a theh lut a ni.