Kuno National Park, Madhya Pradesh-a cheetah dah thar zinga a nu pakhat a thi leh a, March atanga thi pathumna a ni ta.
Thawhlehni zingah khan hliam tuar chunga hmuh a ni a, damdawi thiamten enkawl nghal mah se chhun lai velah a thi tih park chuan an sawi.
Cheetah pa pahnih nen an tualchaina lamah a inhliam niin thuchhuahah tar lan a ni.
Tun hnaia cheetah thi pathumte hi South Africa atanga lak luh, India-a awm thartir leh tumna kawnga lak luh kha an ni.
Thawhlehnia thi hi Daksha-i a ni a. A pa a kawm pahnih, Agni leh Vayu te nen hian khung hran an nih laiin pindan indawt chiaha dah an ni.
“Indian leh South African wildlife thuneitute leh mi thiamte chu April 30 khan inrawnin Daksha-i hi a pa pahnihte hmuhtir turin thu an titlu a, a tukah an inkar gate hawn a ni,” tiin thuchhuahah tar lan a ni.
A pate hi May 6-ah a nu awmnaah hian an lut.
“Inrim laia a nu chunga tharum thawh hi cheetah pate chin a ni a, an chetla lai vil reng hi tih theih a ni lo bawk,” an ti.
India hian kum 70 chuang liam taa an rama an bo zawh hnuah cheetah hi awmtir thar leh tumin beihpui a thlak.
Cheetah awmtir leh tumna hian mi pawh a tiphurin an chanchin reng reng hian chanchinthar a luah thuai zel.
Thla hmasa khan a pa, Uday tia an koh chu a thi a, a thawkna lam fel lo niin an sawi a. Ani hi February thlaa South Africa atanga an lak luh 12 zinga mi a ni.
March 27 khan Namibia atanga an lak luh hmasak zinga mi a nu chu kal tha lo vangin a thi bawk a. Hei hi a pa panga leh a nu pathum an lak luh zinga mi a ni.
India-a thlenpui an nih hlim hian Kuno-ah quarantine zone-ah awmtir phawt an ni a, a hnuah ramhnuaiah chhuah an ni a. An chetla en zui reng an ni.
March 29 khan Namibia atanga lak luh a nu pakhatin no pali a nei.
Cheetah hi India-ah chuan ngaihhlut a hlawhin thawnthu leh thu inhlanchhawnah pawh a lang tam a; mahse, zalenna a neih hnuah an pel nasa a, an chenna thiahsak niin ei tur an tlachham a, an mang zui ta a ni.