Pakistan prime minister hlui, Imran Khan-a chu man a nih tukah Nilaini khan judge hmaah a inlan a, man a nih avang hian an ram pumah duh lohna nasa taka kalpui a ni.
Islamabad-a ei rua puh a nih avanga man a nih hnuah mi 1,000 dawn man an ni tawh a, an puhnaah hian a pa vek.
An awmtirna, police guesthouse chu khauh taka ven a ni a, hetah tho hian courtroom pawh buatsaih nghal a ni.
Khan-a man a ni hi Pakistan-a thiltithei tak, sipaite nena an inkar that tawk loh vang a ni pakhat bawk.
Thiam loh chantir a nih chuan inthlan chuh thei lo tur a ni nghal ang.
Thawhlehnia an man hnua Pakistan ram chhung khawpui hrang hranga duh lohna lantira tharum thawhna thlengah mi pahnih vel thi an awm tawh.
Cricket star thin, kum 70 mi hi kum li tling lo deuh prime minister a nih hnuah nikum April khan paih thlak a ni.
November thla khan a campaign-na hmunah Wazirabad khawpuiah mipui zinga a awm lai a ke-ah kah a ni.
Intelligence thuneitu sang pakhatin amah beihna tur ruahmanna a siam niin a sawi a, hei hi tun hnai khan sipai chuan a pha a. Man a nih hma ni chiah khan thu belhchian dawl lo sawi tawh lo turin an vau nghe nghe.
Tunah hian ei ruk leh ram do zawnga chea puhna hrang hrang thubuai a awrh mek a, amah chuan politics-a an beihna mai mai niin a sawi a. Thawhlehnia man a nih hma khan vawi tam man tum a lo ni tawh a, court-a inlan tura a kal chu an lo man ta a ni.
Amah tantute chuan Pakistan sorkarin kumin October thlaa an ram inthlanpuia a chuh ve theih loh nan hetiang hian thil an ti mai mai niin an sawi a. Khan-a hi ram pumah inthlan huaihawt hma a nih theih nan a campaign nasa hle a ni.
Planning Minister Ahsan Iqbal chuan, “Pu Imran Khan-a hi dan hmaah a ding dawn a, pawi a khawih lo a nih chuan inthlan a chuh thei ang; mahse, a lo ei ru a nih chuan dan angin a chungah tih a ni ang,” tiin Nilainia thuthar lakhawmtute hmaah a sawi.