- Ruata
Kia India chuan an compact SUV mawi leh hralh kal tak ni chho mek, Sonet chu edition thar, Aurochs Edition an tichhuak leh ta.
Sonet Aurochs Edition thar hi a bul tanna Rs 11.85 lakh (ex-showroom, Delhi)-in Kia hian an rawn tichhuak a. He special edition hi X-Line hnuaiah a thu dawn a, HTX Variant chhuak mek nghahchhana duan a ni a. He edition thar hi a landanah tuna chhuak mek te nena khaikhinin edition hran a ni bawk a, danglamna a awm nual dawn a ni.
Sawi tawh angin he Sonet thar hi HTX trim nghahchhana duan a ni a, chuvangin he Aurochs Edition thar hian 1.0L turbo petrol leh 1.5L turbo diesel engine te duhthlan tur a nei tihna a ni a. A vaiin variant 4 a awm a, petrol version hi iMT leh DCT gearbox duhthlan tur a awm a, diesel version hi iMT leh torque converter automatic gearbox te duhthlan tur a awm thung a ni.
Aurochs Edition design
Edition thar hi rawng chi 4 – Gravity Grey, Aurora Black Pearl, Sparkling Silver leh Glacier White Pearl te a awm a. Styling lamah chuan Aurochs edition thar hian design element thar a nei a, sports lam rawngkai design a nei a ni. Front skid plate thar a nei a, a hma bawr Tiger Nose grille-ah hian Tangerine accents a awm bakah Tangerine center wheel cap te a nei bawk a. Hei bakah hian Aurochs Edition Emblem, Aurochs side skid plate leh rear skid plate te pawh a awm bawk a. He SUV edition thar hian inch 16 diamond-cut alloy wheel a nei a, LED lighting hmangin LED headlamp leh LED tail-light te a nei a ni.
A chhunglam leh kentel
Special edition thar hi Black leh Beige two tone interior scheme hmanga duan niin a chhung hi a mawi dawn viau a. Hmanraw kentel lamah chuan he SUV hian electric sunroof, height adjustable driver seat, flat-bottom steering wheel, smart key push-button start nei, cruise control, leh automatic AC bakah thil hrang hrang a nei.
He edition hian 8 inch touchscreen infotainment system a nei a, heath hian wireless Android Auto leh Apple CarPlay te a awm a ni. Drive leh traction mode a keng tel a, airbag pali, ABS with EBD, brake assist, electronic stability control, hill-start assist control, vehicle stability management, projector fog lamp, rear parking sensor, tyre pressure monitoring system leh a dangte a keng tel bawk a ni.
A khawl
Aurochs Edition thar hian engine option pahnih – 1.0-litre 3-cylinder turbocharged petrol leh 1.5-litre 4-cylinder turbo diesel te a nei a. A hmasa zawk hian 118bhp power leh 172Nm torque a pechhuak thei a, turbo diesel engine hian 114bhp power leh 250Nm torque a pe chhuak thei thung a ni. Heng petrol leh diesel khawlah te hian iMT (Intelligent Manual Transmission) a awm a, six-speed torque converter automatic gearbox chu turbo diesel-ah a awm thung a, 7-speed DCT (dual-clutch transmission) chu turbo petrol engine-ah a awm a ni.
SUV hralh kal leh lar
Kia lirthei ho hi India ramah hralh a kal chho viau mai a. Mizoramah pawh kan hmelhriatna a la rei vak lo a. Dealer mumal taka an lo awm takah hian lirthei mawi leh tha a ni bawk a, leitu an tam chho ta viau mai a. Kia SUV pahnih Seltos leh Sonet hi Aizawl khawpuiah leh Mizoram hmun hrang hrangah kan hmu tam chho ta hle a ni. Tunah hian edition thar duhawm tak mai a lo chhuak leh ta a, he lirthei ngainatute tan chuan thu lawmawm tak a ni a. Duhthlan tur mawi tak, edition ‘special’ tak a awm thar leh ta a ni. He Edition hi Rs. Nuai 11.85 – 13.45 (ex-showroom, Delhi) man inkarah a awm dawn a. Aizawl showroom-ah chuan a man hi a danglam hlek awm e.