Aizawl : Mizo Hmeichhe Insuihkhawm Pawl (MHIP) hruaitute’n Larsap Dr Hari Babu Kambhampati chu a chenna, Raj Bhavan-ah an kawm a. Manipur tual chhung buaina chhuak kara hmeichhia leh naupangte dinhmun tha lo tak sawipuiin, chak zawka hmalak a nih theih nan India President leh sorkar laipui nawr turin an ngen.
MHIP hruaitute’n Larsap hnenah lehkha an theh lut a, President hnena an lehkhathawn pawh Larsap hnenah hian theh lutin President hmuh tura thlensak turin an ngen nghal.
MHIP te chuan an lehkha theh luhah hian Manipur state a buaina chhuak chu pawi an tih thu tar langin, “He e buaina chhuak karah hmeichhiate leh naupang pawisawi lo te’n kut an tuar chu kan dem,” tiin, a rang thei ang bera boruak ralmuang siam thuai turin central leh state sorkar thuneitute an ngen a ni.
Larsap nena inkawmnaah hian MHIP President Ngurmawii Sailo, General Secretary Lalliani, Treasurer K. Lalliantluangi te hi ECM pahnih Lalhmangaihi leh Prof Zokaitluangi te’n an tawiawm a ni.