Aizawl khawpui lakna pui ber, Tlawngah tunlai hian tui a tlem hle a, PHE department hotute chuan Aizawl chu tui in tura harsatna tawk thei dinhmunah a ding mek tih an sawi.
Aizawl Water Transmission Division-a Executive Engineer (EE) Er. C Zothantluanga chuan tun dinhmuna Tlawnga tui luang pangngai atangin Phase I leh II-a mi tur tui pump chhuah tur khawp a awm ta meuh lo tih The Zozam Times a hrilh a, Temporary Seasonal Barrage-a tui an khuap nen tang dunin khaihlak awm loin tui an la pump chhuak hram hram tih a sawi.
Er. C Zothantluanga chuan May 9, 2023 khan Tlawngah hian tui 39.9 MLD chauh a awm a, chu pawh Temporary Seasonal Barrage-a tui an khuap nena belhkhawm a nih zawk thu a sawi a, luia luang pangngai phei chu tlem tak a nih thu sawiin, “Ruah tui hi a tla lawk lo a nih chuan ni thum vel ral hnuah chuan tui pump tur a awm tawh mang lo ang a, Aizawlin tui in turah harsatna nasa tak a tawk thei,” a ti.
Tlawnga tui a tlem zel dan sawiin kum 2019 khan tui luang tlem lai ber chuan MLD 70.742 a ni a, a kum lehah tui luang tlem chho zelin 2020-ah MLD 65.97 niin, 2021-ah phei chuan tui a tlem zual hle a, MLD 31.561 chauh a ni a, 2022-ah erawh ruah tui a tlak tam deuh avangin a kum hmasa aiin a pung hret a, MLD 80-90 chho a ni a, kuminah tla hniam lehin 39.9 MLD a ni thung.
Er. C Zothantluanga chuan Tlawngah tui a tlem zel avangin department lam pawhin tui an pump zel dan tur sawi mai a harsat tawh thu a sawi a, hemi avang hian mipuite chu tui ren thiam turin a chah a ni.
Tui in turah harsatna lian zawk a thlen zel lohna turin tui hna siamtu ramngaw hum halh that a tul thu sawi bawkin, Tlawng phei chu Aizawl tui tlan ber a nih avangin humhalha a fintu lui tête pawh humhalha tihbawlhlawh loh a pawimawh thu sawiin, mihring nunna hnar tui thianghlim in tur a awm reng theih nan tan ho a tul tak zet tih a sawi bawk a ni.