Thawhtannia mipa tennis ranking thar tarchhuahah Indian veteran tennis player Rohan Bopanna chuan season bul a tan fuh hlawkpuiin mipa double ranking bikah world number 11 a luah a, kum 43 mi ni tawh chungin a chhuahsan tawh toip 15 a luahkir leh.
Bopanna leh a Australian doubles partner Matthew Ebden chuan karliamta Inrinni mai khan Madrid Open final khelin, Russian pair Karen Khachanov leh Andrey Rublevon lakah 6-3, 3-6, 10-3-in tlawm mah se ranking tharah Indian tennis player dinhmun hia chawikang zui ta tho a ni.
Kumin March thla mai pawh khan Bopanna hian history-a a hming ropui nemkai turin BNP Paribas Open-ah Ebden nen bawk an champion a, ATP Masters 1000 champion thei upa ber a ni.
Qatar Open leh Indian Wells lama champion tawh Indo-Australian pair hian Madrid Open-ah khan season kal laia an title pathumna an beisei a, an hlawhtling ta rih lo.
Madird kha kumin chhunga Rohan Bopanna final vawili luhna ni tawhin, Australian Open 2023-ah khan a chipui Sania Mirza nen final lutin, an chak zo lo.
Ranking thara a dinhmun sawiin Bopana chuan, “World ranking-a 11-na ka luah chho leh thei hi a mak tawp a, he ranking-a ka chuan hnuhnunber chu kum sarih kalta daih tawh kha niin, min thlawptute zawng zawng chungah ka lawm e,” tiin Thawhtanni khan Twitter lamah a lawmna luangliam a tarchhuak.