Manipur-a BJP MLA Paolienlal Haokip chuan an state-a Zohnahthlakte rilrua lian ber chu inrelbawlna hran neih emaw, union territory emaw, rorel pakhat hnuaia awm khawm a nih thu a sawi.
Manipur MLA hi Mizoramah zinin a thlenna hmunah The Zozam Times-in a kawm a, zawhna chhangin Manipur-a Zohnahthlakten an duh ber chu anmahni nuai bo duhtu Meitei-te laka inlak hran a ni a, inremsiama tha leh nghet tak a awm a nih loh chuan Zohnahthlakte hi Manipur-ah hian an thla a muang tak tak thei dawn lo a, an hun tawn zel tur chungchang pawh sawi lawk harsa a tih thu a sawi a, hemi avang hian Zohnahthlakte chuan inrelbawlna hran neih emaw, union territory emaw, rorel pakhat hnuaia awm khawm chu an rilruah a lian hle tih a sawi.
Haokip chuan Meitei hoin buaina an siam avanga ram puma tharum thawhna chhuak chu sorkarin a duh chuan darkar hnih thumah lekah a titawp thei a; mahse, sorkar hian buaina thlen hi pawi a ti lo a, hengte avang hian Chief Minister Biren Singh-a chungah rinna a nei tawh lo tih a sawi.
Tharum thawh zawnga chetna chu danpui kalh a nih thu sawiin, sorkara lu berin hetianga ram dan pawisa lova chete a thlawp chu ram danpui kalh a nih thu a sawi a, “MLA ka nihna angin min thlang tlingtu, ka bial mipuite tan ka ding zel dawn a, dan kalha chetna chu do zel ka tum,” a ti.
Tun dinhmunah chuan central force-te Manipur-ah dah luh an ni tawh avangin intualvuakna thleng leh buaina lian tham chuan ziaawm lam a pan rih tih a sawi a, hetihlai hian heng buaina zawng zawng bul tanna sorkar hotupa, chief minister chuan a nihna ngai a la chelh reng a nih chuan buaina hi reh mai thei a ni lo a, chu chu buaina tham a la tling tih a sawi.
Manipur MLA chuan buaina an tawh chungchangah Mizoram mipui, sorkar, MZP, YMA leh mi dangten an chunga hmangaihna an lantirnaah an lawmin, an thla a muan phah hle tih a sawi a, “Kan buaina avangin Mizoram lam kan pante a tul a, raltlante min lo dawnsawn dante hian hnuk a tiulh zawk a, ‘I ram i lo thleng ta e’ tih thu ziakte hian min lo thlamuan hle,” a ti.
Hengte avang hian an lawm hle a, lawmthu sawi tura Mizorama zin a nih thu sawiin, sorkar hotu, YMA leh MZP hruaitute nen inkawm an tum thu a sawi.
Haokip chuan Mizoram chu Zohnathlakte tana Jerusalem, an inpui a nih thu sawiin, Myanmar leh Bangladesh-a Zohnathlakte pawhin harsatna an tawha an tlan luhna leh an thlamuanpui chu Mizoram a nih thu a sawi a. Engtik niah emaw chuan hmun khata chengin, tuma tihbuai theih loa awm khawm hun a thlen ngei a beisei tlat thu a sawi bawk a ni.