Aizawl : Mizorama lui te humhalhna atana committee on draft Mizoram protection bill hnuaia sub-committee-in nimin khan Deputy Chief Minister Tawnluia hovin dan an duan chhin te an thlirho.
Dan duan chhin (draft bill) sawihonaah hian Agriculture Minister C. Lalrinsanga leh LAD Minister K. Lalrinliana leh Chief Secretary Dr. Renu Sharma te pawh an tel.
Tawnluia chuan “Mizorama lui te chu tui in tur atan te, thlai chawmna atan leh thil danga kan rinpui berte an ni a, mihring kan lo pung chho zel angin tui mamawhna pawh a sang chho ve zel a, mahse hetih rualin kan tuihnate kiam lam a pan zel si avangin nasa leh zawka kan lui te hi humhalh a ngaih avangin hetaing dan siam chu tul a hriain dan ruangam tur hi duan chin a ni” a ti.
Agriculture Minister C. Lalrinsanga, he dan duang tura din sub committee Chairman pawhin sik leh sa inthlak danglam nasat avangin sorkarin hmathlir thui tak neiin lui te humhalhna dan neih chu tha a tih avangin a ruangam tur duan a nih thu a sawi a. Dan puitling leh funkim tak a nih theih nan tui leh lui chungchanga dan awmsa te zirchianga chungte nen en mila he dan hi duan chhin a nih thu a sawi.
The Mizoram (Protection of Rivers) Bill, 2023 duan chhin chu zau taka sawiho niin, a bung leh chang hrang hrangte uluk takin an thlirho a. He danin a hrut leh a kaihhnawih department hrang hrang – PHE; Environment, Forest & Climate Change; Agriculture; Irrigation & Water Resources; Land Resources, Soil & Water Conservation; Local Administration; Land Revenue & Settlement leh Fisheries Department-te aiawh bakah GAD leh Planning & Programme Implementation Department Secretary te pawh pawh sawihonaah hian an tel a ni.