MZP-in MBSE-in nimina HSLC result felfai taka a tihchhuah avanga lawmawm an tih thu an sawi a. Top 10-ah ram leilungfa mi 14 lai an lang pawh lawmawm an tih thu an sawi.
HSLC pass thar zawng zawng an lawmpui thu MZP chuan sawiin, hlawhtling ve ta rih lote chu beidawng mai lova rilru thar nen a lehpekah hlawhtlinna chang ngei tura bei sauh sauh turin an chah.
MZP chuan nikum aia HSLC pass za zela chhuta an tam zawk pawh lawmawm an tih thu pawh sawiin, nikumah 70.64-in an pass laiin, tun tumah 71.14%-in an pass thei chu lawmawm an tih thu an sawi bawk.
CYMA pawhin HSLC pass thar zawng zawng lawmpuiin MBSE-in HSLC result felfai taka a tihchhuah avang pawhin a thawkte inpeknaah lawmthu an sawi.
HSLC pass percentage 71.14% a ni leh nikum aia pass percentage a sang zawk pawh lawmawm an tih thu CYMA chuan an sawi a. Hlawhtling ve ta rih lote chu beidawng mai lova kal zel turin duhsakna an hlan.
MNF thalai pawhin HSLC pass tharte lawmpuiin hlawhtling ve ta rih lote an tawrhpui thu an sawi a. “Zirlai hlawhtlinna sang tak neihpui thei zirtirtute inpekna fakawm kan ti,” an ti.
Mizoram aia board exam buatsaih hmasa zawk, CBSE leh ICSE aiin MBSE-in result an peih hma thei zawk chu School Education Minister Lalchhandama Ralte leh department a thawktute thawhrimna a nih thu sawiin, chhuanawm an tih thu MNF thalai chuan an sawi.
HSLC exam-a a pum puiah mark 500-ah mark 485 hmua pakhatna, Cynthia Lalhlupuii Shangpliang thawhrimna leh zirtirtute inpekna lawmawm an tih thu an sawi.
Kum hmasaa pass percentage aiin kumin a sang zawk tih sawiin, “Zirnain hma a sawn hle,” an ti a. Exam zawng zawng pass vek school 107 an awm laia fail vek school 14 an awm chu pawi an tih thu MNF thalai chuan sawiin, sorkarin a enkawl school atanga pass 57.71℅, deficit school pass 92.18℅, aided school pass 69.26℅ leh lumpsum school pass 65.32% an awm thei pawh lawmawm an tih thu an sawi bawk.