Mizoram Board of School Education (MBSE) chuan nimin khan High School Leaving Certificate (HSLC) Examination, 2023 result a tichhuak a, Cynthia Lalhlupuii Shangpliang d/o Kyrshanbor Shangpliang, St. Paul’s Hr. Sec School, Aizawl-a lut chu pakhatna an ni.
HSLC result hi MBSE office, Chaltlangah tar chhuah a nih bakah online hmanga tihchhuah a ni bawk a, MBSE office tualah result entu pungkhawm thahnem tak an awm a ni.
HSLC Examination-ah hian exam hmachhawntu regular student 1,778 leh private-a exam mi 324, an vaiin mi 18102 an awm a, chung zinga mi 12,878, zaa 71.14 an pass, zirlai hlawhtling ta zingah chuan hmeichhia tam zawkin 6,794 an ni a, 6,084 chu mipa an ni a, hmeichhia hi 710-in an tam zawk.
Zirlai 1,302 chu distinction-ah an pass a, first division-ah zirlai 3,488, second division-ah 4,731, third division-ah zirlai 3,357 an pass a, compartmental chance nei zirlai 62 awmin, zirlai 5,162 an fail a ni.
District malah Aizawl district pass percentage a sang ber a, za zela 82.96 a ni a, candidate zawng zawng pass vekna hi sikul 107 a awm a, candidate zawng zawng fail vekna sikul 14 a awm bawk.
Sorkar sikul atanga candidate zingah zaa 57.71 an pass a, deficit school atangin candidate zinga zaa 92.18, aided school atangin candidate zinga zaa 69.26, lumpsum school atangin candidate zinga zaa 65.32, private school atangin candidate zinga 83.50 leh private-a exam beitu zingah zaa 33.95 an passed a ni.
Kumin HSLC result chhuakah hian top 10-ah, mi 17 an lang a; a pum puiah Cynthia Lalhlupuii Shangpliang, Kyrshanbor-a Shangpliang fanu, St. Paul’s Hr. Sec School, Aizawl-a lut chu pakhatna an ni a, mark 485 a hmu a, nikuma pakhatna aiin mark a hmu sang zawk.
The Zozam Times zawhna chhangin Cynthia-i chuan pakhatna nih chu beisei ngam chiah loh mah se theihtawp chhuaha pakhatna nih tuma lehkha a zir thu a sawi a, higher secondary-ah science subject lak chhunzawm a, IAS nih a tum thu a sawi a, lehkha a zir dan sawiin zan lamah lehkha a zir nasa a, dar 1 dar 2 thleng te menga lehkha a zir thin thu a sawi a, social media a khawih mumal loh thu leh lehkhabu a chhiar nasat thu a sawi.
HSLC result tihchhuah a nih hnu hian MBSE Chairman JH Zoremthanga chuan thuthar thehdarhtute a kawm a, India ram pumah HSLC bikah result tichhuak hmasa ber ni theia an inhriat thu a sawi a, “Hmun danga kal duhte tan pawh admission-ah buaina a awm lohna turin board dangte ai pawhin result hi kan chhuah hmasa,” a ti.
Kuminah hian nikum aiin pass percentage a sang zawk a, hei hian zirnaah hmasawnna a thleng zel tih a lantir thu a sawi a, zirnain hma a sawn zel theih nan zawhnate chu lots atangin zaa 60 siam a ni a, a bak 40 chu application leh hots atanga siam a ni tih a sawi a, exam paper edik kawngah an uluk hle a, kum danga la tih ngai lohte pawh chin thar an neih thu a sawi a ni.