I&PR Minister Lalruatkima’n Manipur buai avanga sahimna zawnga Mizorama lut, Saitual Jail quarters-a awm mekte nimin khan a tlawh.
Manipur buai avanga Mizorama sahimna zawnga lut Zofate chu Lalruatkima chuan, “Kan unaute an ni a, an natna chu kan natna a ni a, an tawrhna pawh kan tawrhna a ni,” a ti a. “Kan unau Manipur, Burma leh Bangladesh-a miten harsatna an tawk mek tih kan hria a, a pawi kan ti takzet a. Mizorama rawn raltlan mekte a hnam anga kan lo dawnsawn a pawimawh hle, sorkar, kohhran, NGO leh mipui zawng zawng tangruala thukhat vuaa kan lo buaipui mekte hi a ropui ka ti takzet a ni,” a ti.
Lalruatkima chuan, “Zofate hi ram hrang hrang – India, Burma leh Bangladesh-ah te thendarhin kan awm a. Hei bakah hian India ramah pawh state hrang hrangah thendarh kan ni a. Zofa thendarha awmte rorelna pakhat hnuaia awm hi kan nghakhlel em em a, Pathian engkim tithei zarah chu hun chu Zofate hian kan chuang kai ngei ang tih ka ring tlat a ni,” a ti.
I&PR minister chuan, “An sahimna zawnga Mizorama rawn raltlan mek kan unaute, anmahni in leh lo ngeia hlim taka an let theih kan duhsak a. Chutih rual chuan an himna duha raltlante kan theih ang tawka chhawmdawl hi Zofa zawng zawngte mawhphurh a ni,” a ti a. “Assam nen kan ramri a buai a, silai hial a puak a. Assam-in min danchah vek lai khan, ‘Ei tur kan neih chhung chu in nghei bik lo vang,’ min ti a. Chutianga min titu kan unaute tuamhlawm hi kan bat a ni. Chutiang chuan min ti lo pawh ni se, kan chipuite tuamhlawm hi kan bat a ni tho tho a ni,” a ti bawk.
Lalruatkima chuan raltlante tan Rs. 20,000 a hlan nghal bawk a ni.