Lengteng bialtu MLA Dr. L. Thangmawia’n Lamka-ah Manipur buai avanga harsatna tawkte tlawhin ei tur buhfai a hlan.
Zomi Students’ Federation (ZSF)-in Manipur buaina avanga Lamka pankhawm an tam thu leh buhfaia harsatna an tawh tan thu an sawi bawhzuiin Lengteng bialtu MLA, Chief Minister Zoramthanga leh Supply Minister K Lalrinliana te hnenah a thlen a, buhfai quintal 200 an lo ruahmansak chu kengin Nilaini khan Lamka a pan a ni.
Manipur-a Zofa chuan harsatna an tawh laia Mizoram sorkarin an mamawhte a ngaihtuahsak thuai bakah MLA ngeiin a hmuna a tlawh chu lawmawm an tih thu L Thangmawia chu an lo hrilh a. An ni tin mamawhte Mizoram kaltlanga an lakluh a tul rih tur thu te, Imphal-a tangkhang mi 20,000 vel zette sipai venna hnuaia Lamka lama hruai chhuah hna kalpui mek chu Nilaini khan zawh fel an beisei thu te, Lamka-ah pawh mahni in chhuahsana raltlan tam tak an awm mek thute MLA hi lo hrilhin, Mizoram atanga puihna leh tawngtaisakna an dawn tawh zawng zawngah an lawmzia te, tun dinhmunah chuan khawvel hmun hrang hranga Zofate chu Pathian tih lohah chuan an innghahna a nih thute an lo hrilh a ni.
L Thangmawia chuan amah lo dawngsawngtute hnenah Mizoram mipuiin Manipur buai avanga Zofate tawrhna chu mahni tawrhna anga an ngaih thu leh Manipur-ah remna leh muanna a awm thuai an duhsak takzet thu te a hrilh a. Kohhranhoten an tawngtaisak reng thu te hrilhin, Mizorama tlawmngai pawl hrang hrangten anmahni pui tura theihtawp an chhuah mek thu leh he buaina avanga Mizorama raltlan lutte pawh ‘I inpui i lo thleng ta’ tih banner nen an lo hmuah thute a hrilh a, Mizoram khaw tin maiin unau an nihna ang taka an lo dawnsawn zel thu a hrilh bawk.
Lamka tlawha kal L Thangmawia chuan Mizoram atanga zirlai, Lamka-a tangkhang mek pangate hawna tur pawh a ruahmansak nghal bawk a ni.