Alia Bhatt chu ramchhunga induhsakna uchuak (nepotism) chungchangah hnuhluhin a awm leh ta a. Film siamtu lar Mahesh Bhatt leh actress Soni Razadn te fanu hi chhungte huhang len vanga vawrhlar nia ri nawn leh chu, “Ka pawm thlap. Midangte aiin chantha zawk ka chang a, remchanna pawh ka ngah,” tiin a chhanglet.
Director sawi hlawh leh milar fate duhsak uchuaka puh thin Karan Johar-a’n 2012 khan Bhatt hi lenchan khawvelah a vawrhchhuak a, thil dang vang ni lovin induhsakna uchuak kaltanga siamchhuahah mi tam takin an ngaih.
Harper’s Bazaar Arabia chhuak thar berah Bhatt hian nepotism chungchang puhna leh sawichhiatna nasa tak chu, “Ni e.. kum tam kalta atang tawh khan hemi chungchang hi a ri deuh reng tawh. Midangte aiin he kawngzawh hi ka tan a awlsam zawk a, remchanna a tam zawk tih ka hrechiang khawp mai.
“Khawi atangin nge heti ang sawi laih laihna hi a lo chhuah tih thleng pawhin ka hrechiang em em a. Ka sawi theih awmchhun chu film-a inlan turin awlsamna leh remchanna zau tak ka tawn hawn a ni a, chumi rual chuan nitin mai hian remchanna leh chantha zawk ka neih avang khan 100% in ka inpe tawp a, ka thil tih reng reng kha ngaia neih ka tum ngai lo. Inphah hniam a, rim taka hna thawh zel hi ka tum leh duh ber a ni,” tiin a sawi.
Heti anga milar fate leh thiltithe zawk fate duhsak uchuak a, film-a hruailuh tlat tuma phet buaina chungchanga in puhna leh sawi hat tlin hi 2016 khan a takin a lo thleng chhunzawm.
‘Koffee With Karan’ show-ah host Karan Johar chu Kangana Ranaut chuan, ‘Nepotism hnarkaitu’ tiin hmaichhanah a puh hmiah mai a, he chat show hian ngaihven a hlawhzui hle a ni.
Johar hi Bollywood-a hmelthar leh mithar chherchhuaktu langsar tak a nih rualin, a vawrhchhuah te hi film industry lamah mi hmasa, milar leh huhang ngah tak tak chhungkua atangin an nih deuh zel avangin amah sawiselna leh thleibik nei a puhna hi a riring thei hle.
A bik takin 2020 kuma Sushant Singh Rajput intihhlum hnu atang phei kha chuan mimal tak pawha beihna leh diriamna a tawk nasa hle a, pawn pawh chhuah huphurhawm khawpin kil hrang hrang atanga nekchep a hlawh.